Shillong, K’Lyngkot 15 : U Myntri Rangbah ka Jylla, ha ka step sngi Thohdieng u la wan ban plie ar tylli ki mawnongrim na bynta ban pynpoi umbam sha ki lai hajar tam tylli ki longïing kiba don ha Umlyngka bad Nongkseh lyngba ka Jal Jeevan Mission (JJM) kaba la kot baroh sha ka 44 klur tam.
Ka Umlyngka WSS kaba la mang ha ka jinglut kaba 28.88 klur tyngka kan pynmyntoi haduh 2242 tylli ki longing katba ka Nongkseh kaba la mang ha ka jinglut kaba 15.84 klur tyngka kan pynmyntoi ïa ki 1230 tylli ki longing ha katei ka thaiñ.
Ïa kitei ki ar tylli ki mawnongrim, u Myntri Rangbah ryngkat u Bah Hamlet Dohling ki la plie ha ka jingïalang kaba long ha phyllaw jong ka skul San Shnong SS, Umlyngka – Nongkseh ha ryngkat ka jingdonlang ki ophisar ka tnad PHE, ki nongïalam shnong na kitei ki thaiñ bad ruh ki paidbah.
Haba kren ha katei ka sngi, u Myntri Rangbah u la ong, “Ka jingkynthup lang ïa baroh ki Census Town jong ka jylla ha ka Jal Jeevan Mission ka plie lad ïa ki shnong kiba khlem pat ïoh ïa ka umbam umdih kaba khuid ba suba. Kumba phi tip ka um kadei ka jingim, kumta ngi sngewkmen ban pyntip ïa phi ba ka jingpyrshang jong ngi ban pynkohnguh ïa ka sorkar pdeng ban kynthup lang ïa ki census town ka la urlong bad mynta kine ki shnong kin myntoi lang na kane ka projek,” u la ong.
“Nga kwah ruh ban ai khublei ïa u Bah Hamlet ba dei namar ka jingïohi jngai bad jingïakhun jong u, mynta baroh ki census town ha kiwei ruh ki constituency kin ïohlang ïa ka umbam umdih ha ki ïing jong ki,” ong u Myntri Rangbah.
U la ong ruh ba dei lyngba ka jingtreiborbah jong kane ka ka sorkar MDA ba ïalam da ka NPP, ba ka Meghalaya ka la kiew mynta na ka kyrdan kaba sha trai duh sha ka kyrdan kaba shakhmat ha ka jingpyntreikam pura ïa ka JJM ha ka ri baroh kawei.
U ong ruh ba kane baroh ka urlong dei tang namar ka jingïatrei lang jong baroh khamtam eh da ka jingïai buddien bad ka jingtrei borbah jong u MLA ka thaiñ Bah Hamlet Dohling.
U Bah Hamlet pat ha ka jingkren kum u Symbud Kongsan u la pyntip ba ki shnong kiba hap ha ka census town kim ju ïoh shuh ïa ka skim JJM namar kadei kaba la mang kyrpang tang naka bynta ki shnong nongkyndong.
Hynrei u la ïathuh pat ba katei ka la urlong hadien ba u la thoh da ka shithi da lade hi sha ka Ministry of Rural Development bad da ka jingbuddien lang u Myntri Rangbah mynta ym dei tang ki shnong ba hap ha Mylliem constituency kiba ïoh jingmyntoi lang hynrei baroh ki shnong kiba hap ha ka census town ki ïoh lang ïa ka jingkyrkhu.
U ong ruh ba ka Umlyngka bad ka Nongkseh ki dei ki shnong kiba la heh bha bad kidei ruh ki shnong kiba mad ïa ka jingkyrduh um kaba jur hynrei mynta lyngba katei ka projek bun ki longing kin sa ïoh um noh ha la ïing.
U Bah Hamlet u la ong ruh ba mynta lada u leit kylleng kylleng ka constituency u sngewphuh mat ba watla u ïoh ban trei tang lai snem na ka daw ba ar snem don ka khlam COVID, pynban ki kam pynroi ba u trei ki la pynhun ïa jan baroh ki shnong ki thaw ha ka constituency.
