Shillong, Lber, 10: U Myntri Rangbah ka Jylla u Conrad Kongkal Sangma ha ka sngi Thohdieng u la phah da ka jingthoh sha u Myntri ka tnat Pule jong ka Sorkar Pdeng u Dharmendra Pradhan ban pyllait kyrpang ïa ka Jylla Meghalaya ha kane ka kynti na kaba pynlong ïa ka eksamin Central University Entrance Test (CUET) ba la pynlong da ka National Testing Agency (NTA).
Ha kane ka jingthoh u Myntri Rangbah u la ong, “ha u snem baladep ngi la kyrpad ïa ka ophis jong phi ban pyllait ïa ka jylla Meghalaya na ka jingpynlong ïa ka CUET lyngba ka shithi DO.CM/PER-UM/2022/48 dated Shillong, the 25th of April 2022, ïa kaba phi la mynjur lyngba ka shithi jong phi kaba DO.No.65-4/2020-CU. dated 11th May 2022.”
“Ngi la shim ruh ïa ki lad ki lynti ban pynkha ïa ka State University, ïa kaba shen ngin sa ïoh ïa ka jingmynjur na u Lat jong ka Jylla Meghalaya,” la ong u Conrad.
Haba pynpaw ïa ka daw ba ka Jylla Meghalaya ka dang donkam ban pyllait na ka jingpynlong ïa ka CUET u Myntri Rangbah u la ong, “ka Jylla Meghalaya dang shen ka la pynlong ïa ka elekshon jong ka Ïingdorbar Thawaiñ bad ïa ka resol ruh dang shu pynbna ha ka taiew baladep. Kane ka la pynslem ban pynlong ïa ka State Board Examination bad ha kaba ïadei bad kane, ki khynnah skul ki la ïakynduh jingeh ban ïakhun ïa ka CUET na ka bynta ban ïoh rung ha ki shlem pule kiba don ha ka jylla ha ka Under Graduate.”
“Katkum ba la kdew haneng, bad bun na ki Kolej ha ka jylla ki dei kiba la ïoh jingithuh na ka North Eastern Hill University, nga kyrpad ïa ka ophis jong phi ban pyllait noh ïa ka jylla Meghalaya na kaba pynlong ïa ka CUET,” la kyrpad u Myntri Rangbah.
