Thoh ka GCCM sha ka KHADC ban pynbeit kyrkieh ïa ki jingdkoh ka Mylliem Act, 2007

0

Shillong, Nohprah, 23: Ka Grand Council of Chiefs of Meghalaya (GCCM) ha ka sngi Thohdieng ka la phah da ka jingthoh sha u Chief Executive Member (CEM) jong ka Khasi Hills Autonomous District Council (KHADC) u Bah Titosstarwell Chyne ban pynkynmaw ha kaba ïadei bad ka jingdawa ban pynbeit kyrkieh ïa ki jingdkoh hapoh ka Mylliem Act 2007; Mylliem Rule 2015, ka Appointment Act 1959 bad ka Appointment Rule 2015 KHADC.
U Chairman jong ka GCCM u Bah John F. Kharshiiing u la ong ba bun bun tylli ki shithi la bun bun snem sha kiba bun ngut ki CEM, ki EM Elaka jong ka KHADC halor ka jingdonkam ban pynbeit kyrkieh ïa ki jingdkoh hapoh ka Mylliem Act 2007; Mylliem Rule 2015 bad ka Appointment Act 1959 bad ka Appointment Rule 2015, hynrei haduh kine ki sngi ngim ïohi ban don kano kano ka jingshimkhia na ka KHADC ban pynbeit ïa ki jingdkoh kiba bun ha kitei ki Act bad ki Rule kiba long ki daw jong ka jingklumar lut baroh ka synshar khadar naduh u pud u sam, ka jingbymdon Dorbar Shnong, Dorbar Raid bad Dorbar Hima kaba tikna hapoh Hima Mylliem.
“Shisien pyrkhat la jied ïa ki MDC kum ki dkhot jong ka Dorbar District Council ba ki ong ki pyrta ha ka por Election ba kin ïada ban ïa pynlut por ban im sngi ban tei ban pynjanai ïa ka synshar khadar. Hynrei ka long shisha kaba sngewsih ba kam shym don kano kano ka jingshim khia na ka KHADC halor kane ka phang ban pynjanai ïa ka synshar khadar ka Hima Mylliem namar ki long kumba baroh ki tip ba ka jingmih baroh na ka Hima Mylliem ki la kylla long ka “ATM” tang jong ki katto katne ngut bad dei na kane ka daw da ki phew snem kane ka Hima kaba shong pdeng ka sah ha ka jingdum bad la shuh sah Acting Syiem sah hapoh Hima Mylliem tang namar ka jingmyntoi jong ki katto katne ngut. Wat ka jingtohkit kaba thung ka KHADC halor ki kam jyrsieh ka shuh sah kut haduh kine ki sngi namar ka jingbymler ki Aiñ jong ka KHADC,” ong u Bah Kharshiiing.
“Lada ïa pyrta ieid jaidbynriew kaei pat kaba khang ban plie lad ban wanrah jingshai ban pynjanai ïa ka saiñhima tynrai hapoh Hima Mylliem kaba dei ka synshar khadar kaba don ha ki Dorbar Kur, Dorbar Shnong, Dorbar Raid haduh Dorbar Hima, ngim ong ban ban pynkylla dur lut hynrei ki don bun ki khep ha kaba ka long kaba donkam eh ban pynjanai ïa ka synshar khadar tynrai khnang ba ki khun ki hajar kin ïoh ban noh synñiang ban tei ban pynjanai shuh shuh ïa ka synshar khadar ka jaidbynriew Khasi namar kane ka long kaba kongsan bha lada ngi dei ban pynneh pynsah ïa ki rukom synshar kiba kyrpang jong u Khasi,” la bynrap u Bah Kharshiing.
U la ong, ha kiba bun ki shnong kylleng ka Ri Khasi ki Dorbar shnong ki lum Dorbar Kut Snem, ki ai jingkheiñ jingdiah, hynrei hapoh ka jingkhmih ka KHADC ka Hima Mylliem pat kim i mon ban ai jingshai.
“Ha kiba bun ki Dorbar Shnong ki longkmie ki la sdang wan shakhmat ban ïa snohkti lang ban ïa synñiang ha ka imlang sahlang hapoh ki shnong khamtam hapoh Hima Mylliem. Ngi ïohi kiba bun ki Dorbar Shnong ki la don ïa ki seng longkmie bad, Seng Samla bad ba ki mih shakhmat ban ïada ïa ka shnong ha manla ki khep ba wan ka jingïakhih lane ka jingklumar khamtam hapoh sor bad khap sor. Hynrei kaba sngewsih ka long ba haduh kine ki sngi ym don kano kano ka aiñ (legal lawful notification) kaba batai shai ïa ka bynta bad ka kam ki longkmie bad ki seng samla ha ki Dorbar Kur, Dorbar Shnong, Dorbar Raid haduh Dorbar Hima,” u la ong.
“Ngi sngewdei ban ai nuksa da kaba sei ïa ka Act bad Rule kaba la thaw bad pynjari da ka District Council ba katkum ka The Khasi Hills Autonomous District (Appointment and Succession of Syiem, Deputy Syiem, Electors and Rangbah Shnong of Mylliem Shyiemship ) Act 2007,” ong u Bah Kharshiing.
“Haba ngi pule ïa ki kyndon Aiñ jong ki ar tylli ki Aiñ, “The Khasi Hills Autonomous District (Appointment and Succession of Syiem, Deputy Syiem, Electors and Rangbah Shnong of Mylliem Shyiemship ) Act 2007” bad ka “The Administration of Mylliem Syiemship, Rules, 2015 ka long kaei kaei kaba lyngoh ba ym don kano kano ka jingbatai shaphang ka bynta ki longkmie bad seng samla ha kitei ar tylli ka Mylliem Act 2007 bad Rule 2015 katba ha kiba bun ki shnong hapoh Hima Mylliem ki Longkmie ki la ïa shim bynta ha ki kam Dorbar Kur, Dorbar Dong bad Dorbar Shnong bad ha kine ki khyndiat snem ngi ïohi la mih bun ki jingklumar namar ka jingïaknieh kam Rangbah Shnong ha kaba ngi la ïohi ka jingïarah lama iong ki jingpyrshah na ka por sha ka por hakhmat office Dorbar Syiem Hima Mylliem ha Mawkhar bad kumjuh hapoh phyllaw Khasi Hills District Council kat haduh ba mih ka jingïakhih ban pynpra ïa ka khyrdop KHADC,” u la ong bad bynrap, “ka ladei ka por ïa phi ki ki bor KHADC khamtam ki 15 ngut ki MDC Hima Mylliem ban sngap sani bhai ïa ki khun ki hajar ka Hima Mylliem ba ngin pyrkhat sani bha ban wan shakhmat ban noh synñiang ha ka Synshar Khadar tynrai.”
Ka long kaba donkam ban pynbeit thymmai ïa ka Mylliem Act 2007 bad ka Mylliem Rule 2015 khnang ban ïoh ban thaw ki lad ban ai bynta lang ïa ki longkmie bad ki Seng Samla kum ki khun ki hajar ban ïa shim bynta ha ki Dorbar Shnong.
Shuh shuh ka long kaba donkam ban khmih bniah ïa ka jingtreikam kitei ki Act bad ki Rule namar la donkam ban ïoh ka jingpynbeit thymmai ban wanrah ïa ka jingsynshar kaba shai ha ka jingpynïaid ïa ka Dorbar Kur, Dorbar Shnong, Dorbar Raid bad Dorbar Hima. Katba ka Mylliem Act 2007 ka ong ba u Syiem bad Dorbar ki dei ban lum Dorbar Hima shisien shisnem katkum ka Riti Dustur, hynrei ngim juh kham ïohi ïa kata ka Dorbar Hima ha kaba ki khun ki hajar kin ïoh ïa ka kaiphod lane ka report halor ka jingkhien jingdiah bad khamtam halor ka jingtreikam jong ka Executive Dorbar, u la bynrap.
“Lyngba jong phi u CEM ka KHADC, ngi kyntu ba phin wer ïa ki 15 ngut ki MDC bad ïa ki MLA na ka Hima Mylliem ban ïa thir ïatai kumno ban wanrah ïa ka jingshai (transparency ) hapoh ka synshar khadar ka Hima Mylliem ban pyni da ka kam ym ban shu pytra ieid jaidbynriew khnang neh ban sah ki Dorbar synshar tynrai da kaba wanrah ïa ki jing pynjanai lyngba ki Aiñ,” ong shuh shuh u Bah Kharshiing.

Leave A Reply

Your email address will not be published.