Leit jngoh ka ophis Mawphor ïa ki Khunswet ha Borsing Syiem Children’s Home

0

Sohra, Nohprah 23: Kum ka dak ka jinglehkmen ban pynpaw ka jingsngew nguh ïa U Blei namar ka jingwan long briew jong U Jisu Khrist ne ka jingrakhe ïa ka Khristmas, ka ophis Mawphor mynta ka sngi, ka la leit ban jngoh ban lehkmenlang ba ki Khunswet ha Borsing Syiem Children’s Home ha Mawsmai, Sohra.
Ha kane ka jingleit jngoh la ïadonlang u Edtitor Bah D. L. Siangshai, Joint Editor Bah P. Sohkhlet, Asst. Editor Bah B. Marbañiang, bad na ka liang ka Management u Bah S. K. M. Marweiñ bad i Kong N. B. Marweiñ bad kiwei kiwei de.
La ïoh ban pynlong ka jingïalang kaba lyngkot ha kaba la pynïaid da u Bah P. Sohkhlet bad la ïoh ïa ka jingkren na u Bah DL Siangshai, nangta na u Rev. P. Kharwanlang, Pastor ka District Sohra Mawsmai bad u Bah B. Marbañiang u la ka khubor Khristmas bad buh ruh ka jingduwai ba kyrpang na ka bynta kine ki khynnah bad ka Home baroh kawei. Na ka liang ka ophis ka la ai jingïarap ruh da ka pisa na ka bynta kane ka Children’s Home ka ban long ka jingpynsah kynmaw ïa u nongseng jong ka Kot khubor Mawphor, u Bah R.M. Marweiñ.
Ka Borsing Syiem Children’s Home ka dei ka ïing ba ri bad sumar ïa ki khunswet ba la seng da ka District Sohra Mawsmai ha u snem 2017. Mynta ka don 26 ngut ki Khynnah, kymthup 14 ki shynrang bad 12 ki Kynthei. Ki khynnah kidei kiba na kylleng ki jaka jong ka Ri Khasi Jaiñtia kynthup na Khliehriat, Pynursla, Kynrud bad na kiwei kiwei de ki jaka. I khynnah ba rit eh i dei iba dang 4 snem iba dei napdeng ki 4 ngut shipara. Kane ka ïing ka la pynmih ruh ïa uwei u Khynnah uba la pyndep ïa ka eksam Matrik mynta u snem.
Ïa kane ka Home la ithuh da ka District Child Protection Unit jong ka East Khasi Hills District, hynrei ïa baroh ki jingdonkam bad ki jinglut jingsep la kyrshan da ka District Sohra Mawsmai bad ka jingmih synñiang ki kynhun bad ki paralok ba ju wan jngoh ïa ki khunswet.
Kane ka Home ka don ha ka liang ka diang ha ka surok ban leit sha krem Pubon, Mawsmai. Ïa ka kyrteng la ai ban pynsahnam ha u Borsing Syiem, uba la kyntait ïa ka khet Syiem jong ka Hima Sohra na ka bynta ban pynkhraw ïa ka kyrteng U Jisu Khrist.

Leave A Reply

Your email address will not be published.