Nongstoiñ, Jymmang 06: Ka jingbun jong ki par maw kiba bha tam ban saiñ nar ha ki thaiñ Nongtrai kata naduh Mawkyllon, Langdongdai, Mawguru, Mawsmai, Nonghawei bad kiwei kiwei ki jaka, ka la pynlong ïa u bah Gardenning Rongrin uwei na ki riew rangbah na katei ka thaiñ, ba un pynleit jingmut kumno ban ïeng ha la ki kjat da kaba pyrshang ban seng da ki kam la jong ba kan long ruh kum ka lad ai kam ai jam ïa ki paitbah nongshong shnong ha katei ka thaiñ.
U bah Rongrin haba ïakren bad u nongthoh khubor, u la ong ba mynta u dang pynkhreh shait shait ïa ki kot ki sla ban pan jingbit na ki bor ba dei peit ïa ka jingseng karkhana kum na ka Khasi Hills Autonomous District Council, Meghalaya Pollution Control Board bad na ka sorkar jylla.
Haba kylli pat ba lada ka don ka jingpyrshah na ki paitbah ban seng ïa ka karkhana saiñ nar, namar bun sien ki karkhana saiñ nar ki dei kiba pynmih bun eh ka tdem kaba ktah ïa ka mariang bad ka jingkhuid jong ka lyer kumno pat un leh haba u la don ka jing thrang ban ka jingangnud ban seng ïa ka karkhana, u la ong ba ha ynda u la dep pynbit pynbiang lut ïa ki kot ki sla bad ki bor ba dei peit ïa ka jingseng ïa ki karkhana, u hap ban pan jingmut shuwa na ki paitbah jong ka thaiñ bad ban pynlong ruh da ka jingpynsngew paitbah. Lada ka don ka jingpyrshah um banse ban konhnguh ïa ka mon u paitbah namar um kwah ba kano kano ka kam ba u trei kan wanrah ïa ka jingpynthut ïa ki nongshong shnong.
Haba pyrshang ban kylli pat ba hato ka khambha ban shalan raw material kumba leh ïa ki maw silimanite u ba ki tih na ki thaiñ Riangdo, ne ka kham bha ban buh da ka karkhana ban saiñ nar ha kajuh ka thaiñ. U bah Rongrin u la ong ba wat lada ki don ki lad ki lynti ban shalan raw material kum ïa u maw silimanite ruh, nyngkong eh u hap hi ban pan jingbit na ki bor sorkar da kaba aplai da ka mining permit, khnang ba kan ym don kano kano ka jingïatyngkhuh bad kii bor ka aiñ lane bad kiwei kiwei.
Haba kylli pat ba halor katei ka jingangnud ban seng da ka karkhana saiñ nar u sngew thikna ne em ba u lah ban pynurlong, u la ong ba lada ki paralok kiba ïatreilang bad u kim kylla jutang bad ki paitbah ka thaiñ kin ai ka jingkyrshan lem, u don ka jingkyrmen ba ïa katei ka jingthmu un lah ban pynurlong.
