Nongpoh, Jymmang 04: Ka seng Longkmie haka shnong Umlyngkdait kaba hap ha Nongpoh Constituency mynta ka sngi kala ïoh syndon da ka ophis treikam kaba paka bala tei lyngba ka skhim SRWP haka jinglut kumba 4 lakh.
Ïa katei ka ophis treikam jong ka seng longkmie la wan ban plie paidbah da u Bah Mayral Born Syiem MLA ka Constituency kum u kongsan haka jingdonlang ki nongïalam shnong, ki nongïalam ka Seng Kynthei naka shnong Umlyngkdait bad ki khun samla.
Haba kren ha katei ka sngi naka liang u MLA u la pynpaw ka jingsngewkmen kaba khraw hadien ba la ïoh ban plie paidbah noh ïa katei ka iing bad ka jaka treikam jong ka seng longkmie ha katei ka shnong kaba kum ki longkmie kila donkam ban dang pyntyllun ïaki kam ki jam ha katei ka shnong.
Naka liang u Bah Mayral Born Syiem u la pynpaw ïaka jingsngewkmen ban ïohi ba ki longkmie ha katei ka shnong ki don ka jingkitkhlieh bad ka jingïatylli ban pyntyllun ïa shibun ki kam ki jam ban tei ïaka iing ka sem bad ka imlang ka sahlang kaba lait naki kam sniew kham thala, namar ki longkmie ki don ka iktiar ban ïada bad wanrah ïaka imlang ka sahlang, kumba ki dei ki nonglum nongda ïaka iing ka sem bad ki khun ki kti.
U la kyntu ruh ïaki longkmie, bad khamtam ïaka shnong baroh kawei ban sumar ïa katei ka iing kaba long ka jaka treikam jong ki longkmie ha katei ka shnong khnang ba kan long ka jingmyntoi bad ka jingkyrkhu ïaki longkmie.
Naka liang ki longkmie bad ka Dorbar Shnong ha katei ka sngi kila ai ruh ka jingkhublei ba kyrpang ïa u Bah Mayral Born Syiem kum u MLA u ba la shimkhia ban pynmang skhim naka bynta ban shna ïa katei ka iing bad jaka treikam jong ki longkmie kaba kum ki longkmie kila angnud ban ïoh ha katei ka shnong naka bynta ban dang pyntyllun shuh shuh ïaki kam ki jam haka shnong jong ki ryngkat ki jingkyrkhu kyrdoh ba un dang lah ban trei bha shuh shuh ïaka kam naka bynta ban wanrah shuh shuh ki kam pynroi ha katei ka thaiñ kumba ki paidbah ki angnud.
