Ther u Bah Ernest Marie ïa ka WeCard bad ka Focus ka NPP, kynnoh ba dei tang kam pynbiej elekshon

0

Nongpoh, Kyllalyngkot 15: U Bah Ernest Mawrie President ka BJP haka jylla Meghalaya u la ther tyngeh ïaki 2 tylli ki skhim bala pynmih da ka party Trinamool Congress haka jylla bad ka jingkular ban peit kyrpang ïaki samla bad ki longkmie da kaba pynmih ïaka MYECard bad ka WeCard kaba la pynkhih win ïaki samla bad ki longkmie haka jylla ban pynrung kyrteng ïalade da kaba kular ruh ban ai 1000 shibnai ïaki samla ki bym donkam bad kumjuh ruh 1000 shibnai naka bynta ki longkmie ha kaba u la ong ba kine ki dei tang ki kam thok kam shukor suda jong ka party TMC haka jylla ban pynbiej elekshon ïaki paidbah haba kren haka jingïalang plie ophis jong ka Party BJP ha Jirang Constituency.
Ha kane ka sngi u la ther tyngeh ruh ïa ka Focus ka NPP kaba la kam ba ka dei kata ka skhim kyrpang na ka bynta ki nongrep bad ki sasmla kiba ym don kam don jam kaba la pyntreikam shuwa ka election ba ka dei tang ka kam pynbiej election bad ban pynkhih win ïa ki paidbah ba kin ioh ïa ka jingkyrshan na ki paidbah ha kane ka election, hynrei ha ka jinghisha kine ki dei tang ki kam pynbiej election bad kiba pynbiej ïa ki paidbah ba bun ki la shah ïalam bakla lyngba kitei ki kam skhim ba la pyntreikam da ka TMC bad NPP.
U la ong ruh ba ka jingdon jong ki nongthep vote ha man la ki constituency haka jylla la sakhi ba ki ba bun hi ki dei ki longkmie, hato ka TMC ka lah ban ai bad pyndep kumba ka kular? Naei kan ioh pisa? La buh jingkylli u Bah Ernest da kaba pynpaw ruh sha ki paidbah ba hapoh West Bengal kiba bun naki paidbah kila shah shet shukor ha ka TMC kaba la kular ban siew bnai ïaki samla bad ki longkmie pynban kam lah ban pyndep ïaki jingkular bad kadei tang ka kam thok kumba ka TMC ka pynmih man ka sngi haki kot khubor ban pynbiej ïaki paidbah khamtam ki longkmie.
Kum u nongïalam jong ka BJP haka jylla u Bah Ernest u la kren shai ruh ba u la iohi dala ki jong ki khmat halor ka jingshah lehbeiñ ki trai muluk bad ki paidbah ha West Bengal ba kim shym la ioh pdiang kumba la kular da ka party TMC bad ki paidbah jong ka jylla kim dei ban biej ïaka buit poh jong ka party TMC kaba la shu kular ïaki paidbah lada ka wan haka bor.
U la ong ruh ba kane ka party kaba dang thymmai haka jylla ka don ruh ki MLA kiba la phet naka seng Congress ki phet shaka TMC bad kim don lad da kiwei ki lynti kila pynmih da kata ka WeCard bad ka MYECard hana ban aikam aijam ïaki samla bad ki longkmie da kaba kular ruh ban pyndep tang lada ka TMC ka wan haka bor.
Namarkata naka liang u Bah Ernest u la ther tyngeh ba ki paidbah kim dei ban ngeit biej bad shah pynngop haka TMC hynrei kidei ban dang puson bad pyrkhat sani bha, hynrei ban phai khmat sha ka BJP kaba don ruh ka bor synshar haka sorkar pdeng lada ki paidbah ki kwah ïaki jingkylla bad ka roi ka par, u la bynrap.

Leave A Reply

Your email address will not be published.