Ngi im ha ki juk ba kyrsum tang ha ka pop, namar ba ngi klet ïa u Blei na ki jingsngewbha pyrthei : Rev. B. Swer

Nongpoh, Kyllalyngkot 15 : Haba sam ïa ka ktien ka Jong U Blei ha ka Jingïaseng District 12 Lyngdoh Shatei kaba 34 kaba la long ha ka Balang Presbyterian Umgtyrnga, u Rev. B. Swer,u la kyntu jur sha ki paid riengeit ba ngi dei ban phai sha U Blei bad ngi dei ban pynjanai ïa ka jinglong Khristan kaba pura.
Kane jingïaseng District 12 Lyngdoh Shatei kaba 34 ka la sdang naduh ka 13 tarik u Kyllalyngkot 2023 bad la pynkut noh mynta ka sngi U Blei, hakaba u Rev. B. Swer u la long u nongsam ïa ka ktien ka jong U Blei sha ki hajar ngut ki paid riewngeit ka Balang Presbyterian kiba la wan ban shim bynta ha kane ka jingïaseng kaba hap ha ka Umling Pastorate.
Ki nongkren ha kane ka jingïaseng ki kynthup naduh u Tbn. M Mawphniang, u Tbn, G. Namsaw, bad u Bah Shemphang M Khongjoh bad u Rev. B. Swer u la dei u nongkren ba kham kongsan ban pashat ïa ka ktien ka jong u Blei sha ki hajar ngut ki paid riewngeit ha ka Jingïaseng noh phai sngi mynta ka sngi u Blei.
“Kum ki khun Khristan ngi dei ban pynjanai ïa lade ba ngi long kita ki khun Khristan bad ngi dei ruh ban pyni sha ka pyrthei ba ngi long ki Khristan, kaba ngi dei ban im shisha kum kita ki khun Kristan” ong u Rev. B. Swer bad bynrap ha kine ki sngi ba mynta la kynrei tang ki kam sniew bad ka daw hi ka long ba ngi phai lyndet na u Blei.
U la ong ruh ba u Blei u la ieit shisha haduh katta katta ïa ka pyrthei ha kaba u la phah ïa la u jong u khun ban wan siew spah ha kane ka pyrthei ym ba long uta u Syiem lane u Kynrad, hynrei u la wan da ka jingsngewrit ban shakri bad ym ban shah shakri.
U la sot ruh na ka Ktien ka jong u Blei na ka Gospel u Ioanis na ka Lynnong kaba 12:20-22 kaba kren shaphang ka jingthrang jong ki Greek ban iohi ïa u Jisu kum uta u Nongpynim bad ïa kane u la pynphalang sha ki paid riewngeit ba ki dei ban kwah ban iohi ïa u Blei ne ban jan sha u Blei bad ym ban kyrsum ha ki kam sniew jong kane ka juk ba mynta ba bun ki la klet ïa u Blei bad ki la pynlong Blei ïa ki jingsngewbha jong kane ka pyrthei.
U la ong ruh ba wat la ka pyrthei ka la jyrsih da ka pop kaba ngi la ngop ha kiba bun ki kam snniew, ka jingshah pynshoi, ka jingshah ïalam bakla, ka jingbishni bad ka jingpihuin, hyrnei u Blei u dang ieit kyrpang ïa ngi bad ka dei pat ka kamram jongngi kum ki khun Khristan ba ngin jan sha U Blei bad lada ngi dang lyndet hi na u Blei kan poi ka por ba ngi hap ban mad ïa ki jingeh kiba khraw kaba u Blei un sa pynshitom ïangi.
Namar kata, u la kyntu ïa ki paid riewngeit ba ngi dei ban phai sha u Blei khnang ba ngin lait na shibun ki jingshah pynshoi bad ki jingshah ïalam bakala ha u soitan bad kum ki khun Khristan ngi dei ruh ban pynjan sha u Blei da kaba pynïasuk ïa lade bad u Blei bad dei hangtan ngin ioh mat shibun ki jingkyrkhu bad ruh ba u Blei un dup pynlait ïangi na shibun ki nem sniew, u la bynrap.
Ha kane ka jingïaseng District la wan ruh ban pynshngaiñ da u MLA ka Jirang, u Bah Sosthenes Sohtun, u MDC ka Nongpoh, u Bah Balajied Rani nalor ki nongïalam niam bad ki paid riewngeit kiba la wan ban shim bynta ha kane ka jingïaseng. La ai mynsiem bad pynshongshit ruh ïa kane ka jingïaseng da ki jingrwai Choir na ki kynhun blang bapher bapher jong ka District 12 Lyngdoh.