Nongpoh, Kyllalyngkot 15: Ki paidbah jong ki shnong khappud ba marjan bad ka Assam kiba hap ha Nongpoh Constituency kila pynpaw ka jingsngewkmen kaba khraw hadien bun phew snem ba kila ap khmih lynti ki skhim pynroi bala mang kyrpang naka bynta ki shnong khappud bala tip kum ka Inter State Border Area Development Programme mynta kila sdang ban treikam naka bynta ka jingmyntoi bad ka jingdonkam jong ki paidbah ka thaiñ khappud.
Kum ban shu pynpaw ba katei ka Interstate Border Area Development Programme kaba dei ka skhim bala mang kyrpang sha ki paidbah ka thaiñ khappud kaba ki shnong ha katei ka thaiñ Nongpoh Constituency baroh shi katta kim pat ioh, hynrei naka jingshimkhia u MLA bun na kitei ki shnong kiba don kumba 23 tylli ki ba shah kynthup ha katei ka skhim kila sdang ban ioh ïaki kam pynroi bad myntoi.
Nalor ki skhim bala dep pyntrei naka liang u MLA ka Nongpoh hynnin ka sngi u la sam sa kumba 3 tylli ki Work Order bala mang pisa lyngba katei ka skhim naka bynta shna ïaki kamra klas ban kyntiew ïaki skul, ba kynthup
Ïaka Sacred Heart Secondary School Marmaiñ bala mang pisa haduh 2 lakh, ka Raid Marmaiñ Secondary School Khulia bala mang pisa haduh 2 lakh bad ka KJCE LP UP School Dondral bala mang pisa haduh 5 lakh.
Shuh shuh ha katei ka juh ka sngi naka liang u MLA ka Nongpoh u la leit ruh ban sam ïaki Work Order sha ki shnong ka thaiñ Marngar bala mang pisa lyngba ka District Mineral Fund ba kynthup 5 lakh naka bynta ka St. Alfred Secondary School Marngar, 3 Lakh tyngka naka bynta ka Auditorium ha Borgang, 3 Lakh tyngka naka bynta ka shnong Sarikushi, 2 lakh tyngka naka bynta ka shnong Lalumpam, 1.50 lakh naka bynta ka shnong Borkhatsari, 1.50 lakh naka bynta ka shnong Umtham.
Ha katei ka sngi la sakhi ruh da ka jingdonlang ki nongïalam shnong, ki nongïalam jong ka Raid Marngar, ki longkmie longkpa bad ki khun samla na kitei ki shnong bapher bapher.
Haba kren ha katei ka sngi naka liang u Bah Mayral Born Syiem kum u MLA u la pynpaw ba ka jingkyrkhu ïaki shnong khappud ha Nongpoh Constituency hadien ba kumba 23 tylli ki shnong ha katei ka thaiñ kila shah kynthup haka skhim ba kyrpang bala tip kum ka Inter State Border Area Development Programme ha kaba kila don ki shnong kiba la ioh pdiang bad pyntrei ïaki skhim pynroi bad ki don ruh kiba dang shu ioh pdiang ïaka work order.
U la ong ruh ba kum u MLA u don ka jingkitkhlieh ban wanrah ïaka roi ka par ïaki shnong bapher bapher bad dei namarkata ka daw ba kum u MLA u la leit ban plie bad ban sam ruh ïaki kam pynroi ha katei ka sngi naka bynta ka jingmyntoi jong ki nongshong shnong ha katei ka thaiñ bad kyrmen ba ki paidbah kin pyndonkam hok bad pyntreikam hok ïa kitei ki skhim kumba la mang bad kyrmen skhem ba shibun ki kam pynroi kin dang wan tang lada ki paidbah ki snohkti lang ban ai ka jingïatreilang.
