Pyllait paidbah ka kong Santa Mary Shylla ïa ka kali kit nongpang ha shnong Umkiang

Khliehriat, Kyllalyngkot 15: Ka kong Santa Mary Shylla, kaba dei ka kyrtong ka ban ïaleh ïa ka Assembly Election 2023 na Sutnga-Saipung Constituency, hynnin ka sngi saitjaiñ ka la pyllait paidbah ïa ka kali kit nongpang (Ambulance) ha shnong Umkiang bad ïa kane ka kali la aiti sha ka Seng Samla Shnong Umkiang.
Haba kren ha ka jingïalang, ka kong Santa Mary, ka la ïathuh ba kane ka jingioh ïa kane ka kali kit nongpang ka dei kaba la ïa don bynta lang ma ka kum ka kyrtong ka ban ïakhun election, u bah Kynjaimon Amse, uba na Umkiang bad u bah Daiapherbha Lamare, uba na Sonapur ha kaba ki la bud dien man ka por na u Conrad Sangma haduh ban da urlong bad la ïoh ïa kane ka kali Ambulance na ka Chief Minister Special Development Fund bad kane ka long ka jingmyntoi ïa ka imlang ka sahlang ban ïarap ha ka por ba wan lap ka pang ka shitom, ka la ai ka jingkitbok kitrwiang ïa baroh ki paidbah jong ka shnong Umkiang bad ki shnong ba mar Jan, ka la kyntu ruh ïa kiba pynïaid ïa kane ka kali ba kin sumar bha ïa kane ka kali, ka ai ka jingkyrkhu kyrdoh ïa uba ñiah ïa kane ka kali bad kitbok kitrwiang ruh ba u Blei un don ryngkat lang ban lait na kano kano ka jingjia ba angewsih.
Ka la ai khublei ruh ïa u Conrad Sangma ba um ju kyntait ban ïarap lem ban kyntiew ïa ka thaiñ Narpuh ha kaba u la ai ruh ïa ka Lumshnong C&RD Block, u la ïarap ruh ha kaba ïadei bad ka surok khappud, kaba la dep pyllait ïa kaba mang tyngka kaba T126 klur tyngka, halor kane ka ai khublei ruh ïa ki nongïalam jong ka Borser Area JAC bad ki dkhot ki a la trei shitom, kumjuh ruh u Conrad Sangma u la pyllait ïa ka mang tyngka kaba T 14 lak tyngka ha kaba la ïoh ban shna ïa kawei ka jingkieng ïaid kjat ha shnong Lumphyllut bad kane ka la ïarap shibun ïa ki paidbah nong shong shnong ban jam na shiliang sha shiliang ka wah, ka la ong ruh ba kan sa ïarap shuh shuh ban pynioh noh da ka surok rong kaba paka ha shnong Lumphyllut kaba don hajan Umkiang.
“Kaba kordor tam ha kane ka thaiñ Narpuh kaba dei ka jingkyrkhu ïa ki paidbah ka thaiñ ka dei ka Lumshnong C&RD Block kaba dang shu dep plie myn ha ka 6 tarik u nohprah 2022 ka ban kham pynsuk ïa ki paidbah ha kaba kim donkam shuh ban leit shaduh Wapung C&RD Block kaba jngai haduh kumba 75 kilo mitar ka jingjngai” ong ka kong Santa.
Halor shibun ki jingleh bha ka sorkar kaba la ïarap ïa ka thaiñ, ka kong Santa Mary Shylla ka kyntu ïa ki paidbah ka thaiñ ba kin sngewbha ban ïarap lem ban ai ka jingkyrshan ïa ka ban ai ïa ki vote sha ka party NPP ba kan poi sha ka thong ban dup lah ban wanrah shuh shuh ki jingmyntoi ha ka thaiñ bad ka constituency hi baroh kawei ba ka jingïatreilang kan dang ïai bteng shuh shuh ban kyntiew ïa ka thaiñ.
Na ka liang u MDC Sutnga, u bah Seiborlang Shadap, u ai ka jingkhublei ïa ka kong Santa Mary Shylla kaba la lah ban pynioh ïa kane ka kali kitnongpang ha shnong Umkiang ka ban ai ka jingshakri ia ki paidbah ka thain kiba dei ruh ki shnong ba marjan bad ka Umkiang, u kyntu ia ki nongpyniaid ba ki sumar bha ia ka kali, namar kane ka kali ka long ka ban ïarap ïa ki paidbah kiba pang ba shitom ka ban ai ka jingshakri ïa ka imlang ka sahlang.