Ther tyngeh ka RNSSWA ïa u Contractor ba trei torti ïa ka surok Mawshynrut-Athiabari

Nongstoiñ, Risaw 06: Ka Ri Nongtrai Sport & Social Welfare Association (RNS&SWA), ka la ther tyngeh ïa u Contractor, da kaba kynnoh ba u la pyntrei torti palat ïa ka surok na Mawshynrut sha Hahim, Athiabari kaba ka jingjrong ka long kumba 37,646 kilometer.
Ha ka kyrwoh khubor ba la pyllait mynta ka sngi, kane ka seng ka la ong ba une u contractor um pat long satia ban phah shna surok, namar u dang ïaid lait ïa bun ki jingbthah kiba don hapoh ka Detailed Project Report (DPR).
Ka seng ka la dep ban aiti ruh syndon ïa ka dorkhas sha u Chief Engineer ka PWD (Road), Shillong ha kaba ka la dawa ba dei ban tuklar mardor ïa kane ka kam jong une u contractor.
Kumjuh ruh ha ka dorkhas, ka seng ka la kdew ba ka jingpynheh ïa ka surok na Mawshynrut sha Hahim, Athabari ka dei kaba la pyntrei da u Bimal Kumar Agarwal bad ka kam, kam shym la ïaid satia kat kum ka DPR.
U President ka RNS&SWA Bah D.Diengngan, u la pynpaw ruh ba ha ka jingjurip ïa kane ka surok, la shem ba bun ki kam kiba une u contractor u la pyntrei ki dei ki bym long katkum ka DPR ba kynthup ïa ka jingrben ka jingsiang maw bad ka rong bad kiwei kiwei.
U Bah Diengngan u la ong ba ka seng ka la lap ruh ba ka jingshna ïa ka kynroh maw, ka guard wall, face wall jong ki Hume Pipe, ki dei kiba synjor bha bad ka jingtah plastar ruh ka dei kaba shu leh tang dep.
U Bah Diengngan u ong ba ka Seng ka la kyrpad ban leh eiei pyrshah ïa une u contractor ba un shna bha bad pynkhlaiñ ïa kane ka surok khnang ba kan long kaba skhem. Katba na ka liang u Chief Engineer (Roads) u la mynjur ban buddien ïa kane ka kam bad kular ruh ba ka Tnad kan sa tuklar noh mar mar khlem pynslem.