Shillong, Ïaïong 20: Ka Harijan Panchayat Committee (HPC) mynta ka sngi ka la ther tyngeh ïa ka sorkar jylla da kaba ong ba ka jingthmu ban pynkynriah ïa ki na Them ïew Mawlong ka long ka jingleh kaba khlem da pyrkhat janai bad ka long ruh ka jingthmu ban khñiot beiñ ïa ki.
“Ngi pynpaw ka jingsngewsih ba hadien ba la thaw ïa ka sorkar kaba thymmai, ki la don ki Myntri, ki MLA bad katto katne ki kynhun kiba la pynmih ïa ki khubor bapher bapher da kaba kop ba ka kam pynkynriah ïa ki na Them ïew Mawlong yn pyndep noh hapoh une u bnai ba mynta”, la ong u Secretary ka HPC u Gurjit Singh. U la ong ruh ba ka Blue Print kaba ka sorkar ka la pynkhreh bad phah sha ïingbishar ka long kaba la shu leh tang dep bad kaba ym ïahap eiei katkum ka jingkhmih lynti jong ki, namar ba ki ïing ki sem ki long kiba rit kum ki sem paro bad kadei ruh ka jingthmu ban knieh noh ïa kamai kajih jong ki. “Kadei ka jingïuh roit ïa ka hok jong ngi”, la ong ka HPC.
Ha kajuh ka por ka HPC, ka la ong ruh ba kane ka jaka haduh mynta ka dang dei ka jong u ka Hima Mylliem bad ka jingthied noh ka sorkar na ka Hima kadei ka jingpynkheiñ ïa ka Land Transfer Act.
Ha kajuh ka por ka HPC ka la kyntu ïa ka sorkar ba kadei ban shah ïa ki ba kin shna ïa ki ïing ki sem ha kane ka jaka ba ki don mynta bad kadei ka kamram jong ki ruh ban pynlong ïa kane ka jaka kaba khuid bad itynnad, namar ba ka ki hukum jong ki ïingbishar bapher bapher ki la kren pyrshah ïa ka jingthombor ïa kiba rit baria.
