Shillong, Nailar 29: Shisngi hadien ba ki Nongkhaïi ki la kynnoh ba ka Seng Hills Farmers Union (HFU) kadei tang ka Dalal jong ki Nongrep, mynta ka sngi pat uwei na ki nongïalam ka HFU, u la ther kylla ïa ki nongkhaïi da kaba ong ba lada ki nongkhaïi phi kynnoh ïa ka HFU ba kadei ka Dalal, hynrei ki nongkhaïi pat kidei tang kita ki High Level.
U President ka HFU, Barato Unit, u la ong ba ki nongkhaïi kim dei satia ba kheiñ bieit ïa ki nongrep, namar mynta ki nongrep kiba bun kidei kiba la nang la stad bad kidei kiba la tip bha shaphang ka kam rep kam riang.
“Wat ju kheiñ bieit ïa ngi bad ngim dei satia kiba shu shong shuki, hynrei ka shuki jong ngi kadei ka lynkha rep”, la ong u heh ka HFU.
Ha kajuh ka por u la ong ba ki nongkhaïi khlem ki nongrep kin nym lahba im, hynrei u nongrep khlem ki nongkhaïi pat u lah ban im, namar u nongrep u don da ki lak ngut, katba ki nongkhaïi pat ki don tang khyndiat ngut.
Kane ka thma ktien hapdeng ki nongrep bad ki nongkhaïi ka la mih hadien ba ka KHADC, ka la ïoh jingmynjur na u Lat ban pynkylla ïa ka aiñ ïew ha kaba lah ban khanglad noh syndon ïa ka jingot kilo jong ki mar rep.
U la ong ruh ba ka HFU ka sngewthuh ia ka jingeh ki nongrep namar bun napdeng ki dkhot jong ka, kidei kiba im ha ka rep ka riang. Kumta u la ong ba ki nongkhaïi kim dei ban kren poh bad kim dei ban pynmih da ki kyntien ki bym sngewtynnad, hynrei lada kidei shisha kita ki riew rangbah kidei ban kren da ki ktien kiba don akor bad lada ki kwah ban iatreilang kidei ban wa shakhmat ban ïakren markhmat.
