Kwah u Bah HM Shangpliang ban iasoh NPP noh, pynbna u Bah Sniawbhalang

Shillong, Nailar 29 : U Nongïalam ka NPP ha ka jylla ba dei ruh u Symbud Myntri Rangbah ka jylla, Bah Sniawbhalang Dhar ha ka sngi Ba-ar u la ïathuh ba u MLA barim ka Mawsynram ba dei ruh u nongïalam BJP ha ka jylla u la pynpaw ba u kwah ban wan pynïasoh noh sha ka party NPP ha shwa ka elekshon Lok Sabha kaban long la shem snem.
Hynrei, u la ong pat ba ka party kam pat rai satïa halor ka tiket ïano kin ai haba ïadei bad ka Shillong Parliamentary Seat.
“U (Bah Shangpliang) u la pynpaw ba u kwah ban pynïasoh sha ka NPP kumta shah ïa u ban wan pynïasoh shwa bad hadien ngin sa ïa kren ïa ka tiket na bynta ka Shillong seat,”ong u Bah Sniawbhalang haba kren bad ki lad pathai khubor.
Utei u nongïalam ka NPP u ïathuh ruh ba ki don haduh hynñïew ne phra ngut ki kyrtong kiba pynpaw ba ki kwah ban ïakhun naka tiket NPP ha ka elekshon MP kaban long shen u snem ban wan.
“Tangba halor kane, ka party shen kan sa shong bad shim ïa ka rai haba ïadei bad katei ka phang. Ka don ka kyndon kaba ngi hap ban bud ban jied ïa ki kyrtong. Kumta, ngin hap ban da bishar bniah shwa ïa ki kyrtong ban ïoh ïa ki kyrtong kiba paka,” u la ong.
Nalorkata, u ïathuh ruh ba ka NPP kan pyrshang la kumno kumno ïa ka kyrteng ki kyrtong na Shillong Seat kan pynbna noh ha shwa ka taïew ba khatduh jong u Nailur.
Halor ka jingkylli, utei u heh NPP u la kren shai ba kam don satia ka jingthmu ban khroh ïa u hehduh ka Congress, ba dei ruh u MP ba mynta, Bah Vincent H Pala ban wan pynïasoh noh sha ka NPP.
“U Bah Pala u dei na ka Congress, kumta balei un wan pan tiket nangi? Nalorkata kam don ruh kano kano ka jingpyrshang na ka NPP ban leit khroh ïa u ban wan noh sha ka party jongngi,” u la ong da kaba bynrap ba ka NPP ka la rai ban trei shitom ban ïoh pynliem ïa u Bah Pala.
Haba ïadei pat bad ka Tura, la ïathuh ba ka NPP ka la rai ban pynieng biang da ka MP ba mynta, ka Agatha Sangma na bynta kane ka elekshon ban wan ruh.