Ka Lapangap kam dei ka jaka ïakajia bad ka Assam ka dei jongka Meghalaya : Sniawbha

Shillong, Nailar 29 : U Chairman ka Regional Committee ka West Jaintia Hills bad Symbud Myntri Rangbah ka jylla u Ma Sniawbhalang Dhar ha ka sngi Ba-ar, ula ong ba ka shnong Lapangap kam hap satia hapoh ka jaka ïakajia pud bad ka Assam.
“Kam don satia kano kano ka jingïakajia pud ha shnong Lapangap” ong u Ma Sniawbha haba ïakren bad ki nongthoh khubor halor ki jingjia ïakajia hapdeng ki paid Khasi-Pnar bad ki Karbi ha kane ka shnong.
Ula pyntip ba ka Sorkar Jylla ka la dep ban buh palat ïa 2 platoon ki Pulit bad ïa ka jinglong jingman mynta la lah ban tehlakam.
Haba kylli la kan don ka jingle eiei pyrshah ïa ka jingkynnoh kyntur pud jong ka Assam ha Lapangap, u Ma Sniawbha ula ong “Ka Committee kan sa shong bishar bha ba ha kano ka rukom ka Assam ka kyntur pud”.
Kat kum ka jingong jong u, kane ka jingjia kaba la jia ka jingïakynad ka dei kaba jngai bha na ka shnong Lapangap.
Ula ong ba ki Regional Committee ba la thung da ka Sorkar Meghalaya bad Assam kin sa wanrah ïa ki jingai jingmut kiba pdiang na baroh arliang ban ïa pynbeit noh ïa ki jingïakajia.
U Ma Sniawbha u pyntip ba ki Regional Committee na baroh artylli ki Jylla, dang shen ki la pynlong ka jingïaleit jurip lang ïa ki jaka kiba don hapdeng ka jingïakajia.
“Lada donkam, ngin sa leit biang ban ïa jurip lang” ula ong. Ula bynrap ba ki Regional Committee na baroh arliang kin sa aiti noh shen ïa ka kaiphod ba khatduh sha la ki jong ki Myntri Rangbah, ki ban sa shim pat ïa ka rai ba khadduh halor kane ka kam.
Halor ka jingdawa ka HYC ban ai tiar siat ïa ki paidbah kiba sah ha Khappud, u Ma Sniawbha ula ong “Ki dei kiei (HYC)?. Ki long laitluid ban kren kat kaba ki mon hynrei ka Sorkar kan leh ïa kaei kaba bha tam na ka bynta ki paidbah. Ai ba kin ong kat kaba ki kwah hynrei ngin leh ïa kaei kaba dei eh”.
Haba kynthoh halor ka jingbyrngem ka Karbi Students Association (KSA) ban wanrah ïa ka jinglong jingman kumba jia ha Manipur lada ki paidbah ki rai ban leit sha Meghalaya, u Symbud Myntri Rangbah ula ong “Mano mano ruh ki lah ban kren kat kaba ki kwah. Ka don ka jinglaitluid ban kren hynrei ki Sorkar kin leh ïa kaei kaba bha tam na ka bynta ki paidbah”.
Ha kajuh ka por, u Symbud Myntri Rangbah ula kyntu ïa ki Sengbhalang kiba leit jurip ïa ki shnong khappud ba kin ym pynmih ïa kano kano ka jingkulmar kaba lah ban lam sha ka jingthut ka shongsuk shongsaiï.