Ther ka NPP ïa ka VPP ba mut shim kabu saiñ pyrthei ïa ka Reservation

0

Shillong, Jymmang 19: Ka National People’s Party (NPP), ha ka sngi Thohdieng ka la takraiñ tyngeh ïa ka VPP halor ka jingmih syndet jong ki ïa ka jingïalang kaba ka sorkar ka la khot na bynta ban batai ïa ki seng saiñ pyrthei shaphang ka Roster system bad ki jingpyntreikam jong ka.
Haba kren sha ki lad pathai khubor ka nongaiktien ka NPP ka Kong Ampareen Lyngdoh ka la ong ba ka jingkhot ka sorkar ïa kane ka jingïalang ka long ban ïakren halor kane ka mat ban sngap ruh ïa ka jingai jingmut, ‘hynrei ki jied pynban ban mih sha surok kan ym rah jingmyntoi eiei namar ki aiñ la thaw ym ha surok,’ ka la ong.
U Dr WR Kharlukhi uba dei u State President ka NPP u la ther tyngeh da kaba ong ba kane ka jingleh ka VPP ka dei tang ka drama ba ki leh na bynta ban myntoi saiñ pyrthei ha ka elekshon MDC ban long ha u snem ban wan.
“Kam myntoi ka jingïakhih ha surok hynrei ki dei ban tip ioh ka jia pynban kumba jia ha Kashmir ha ka jylla jong ngi na kata ka daw kim dei ban shu leh shongshit ïa kane ka mat,” u la ong.
Ka Kong Ampareen Lyngdoh ka la ong ruh, ba ka sorkar ka bud ïa ka jingbthah jong ka High Court ha kaba ïadei bad ka Roster System jong ka Reservation Policy.
“Ki dkhot jong kawei na ki seng saiñ pyrthei ki la jah ban ïashimbynta ha ka jingïalang watla ka ïing ka long kaba plie ban ïakren halor kino kino ki jingbynñiaw ne jingartatien. Kane kadei kaei kaei kaba hap ban pynbit pynbiang, ngi hap ban buh ïa kiei kiei ha ka lynti kaba dei. Lada don kino kino ki jingartatien ne jingkylli kiban buh, ngi la pynbiang ïa ka rynsan” ong ka Kong Ampareen.
Lah ban kdew hangne ba ka VPP kala pynsawa jam ïa ka sur halor ka jingbym iohlad ban kren ha ki rynsan kiba biang ban ïakren halor katei ka mat, hynrei ha ka sngi Thohdieng kila mih jyndat na ka jingïalang jong ka All-Party Meeting namar ka jingsngew ba ka dei ka jingïalang ka bym don jingmut na ka daw ba ki kwah ban ïakren halor ka Reservation Policy ym ha kaba ïadei bad ka Roster System.

Leave A Reply

Your email address will not be published.