Shillong, Jymmang 19 : U Myntri Rangbah ka Jylla Conrad K Sangma ha ka sngi Thohdieng u la pynpaw ka jinglyngoh bad buh jingkylli ruh halor ka jingphet jyndat noh ki nongïalam ka VPP na ka jingïalang ban pynshai halor ka Roster System kaba ka sorkar ka la khot ïa baroh ki party kiba don ha ka jylla.
Haba kren sha ki lad pathai khubor, u Myntri Rangbah u la ong, “Baroh ki sengsaiñpyrthei kynthup na ka Liang Pyrshah bad Liang Synshar ki sngewthuh ïa kaei kaba ka sorkar ka leh halor ka roster system hynrei ngam lah ban peiphang ïa ka jingleh jong ka VPP.”
Shuh shuh u ong ba ha kaba nyngkong dei ma ki kiba kwah ban kren halor katei ka mat hynrei mynta pat ki wanrah da kawei ka mat. “Kadei ka rai jong ki, nga shu kyrpad ïa ki ba ngi dei ban sngewthuh ba ngi dei ki nongïalam ba don ka jingkitkhlieh bad ban sngewthuh ba ngi don ruh ka jingkitkhlieh ïa ka jylla bad ïa ki nongshong shnong baroh,” bynrap biang u Myntri Rangbah.
Kawei pat kaba u Conrad u ong ka long ba donkam pat ban sngewthuh ba kino kino ki kam kim dei pat ban ktah ïa ka jingshong suk shongsaiñ hapdeng ki jaidbynriew bynriew bapher bapher kiba lah ban ktah ïa ka jinglong kawei ha ka jylla.
U ong ruh ba kano kano ka kam ba ki leh kam dei eh tang na bynta ka politik lane ban ïoh jingmyntoi politik hynrei ban don ruh ka jingkitkhlieh na bynta ka shongsuk shongsain bad ka jingshngain jong ki nongshong shnong. Nalorkata, u la pynpaw ruh ba kum u Myntri Rangbah u long uba kloi ban pyntikna ba un sngap lut ïa baroh kiba kwah ban kren ne ai jingmut.
Na ka liang ka VPP ka la pynshai ba ka jingmih jyndat kadei namar ba ka jingïalang kam treh ban ïakren halor ka Reservation Policy kaba dei ka nongrim ba ka Seng ka ïeng ha ka nongrim naduh ba sdang.
