Rai ka sorkar ban pynsangeh khot thep kam thymmai, thaw Komiti halor ka Roster

Shillong, Jymmang 19 : Ka sorkar jylla hynne ka sngi Thohdieng ka la pynbna ban pynsangeh shwa ïa ka jingthung kam thymmai nalor ba ka la rai ruh ban thaw da ka komiti halor ka Roster System.
Ïa katei ka rai, ka sorkar MDA ka la shim hadien ka jingïalang jong baroh ki party kynthup na ka liang synshar bad liang pyrshah hapoh ka jingïalam jong u Myntri Rangbah ka Jylla ha Secretariat.
Katba ka jingïalang ka dang ïaid, na ka liang ki nongïalam jong ka VPP bad ka KHNAM ki la phet jyndat noh kum ka dak ka jingpyrshah ïa ka jingbym wanrah jong ka sorkar ban ïakren halor ka mat kaba ïadei bad ka Reservation Policy.
Na ka liang u Myntri Rangbah haba kren bad ki lad pathai khubor u la pyntip ruh ba ïa katei ka komiti ba kin thaw yn khlieh da ka Myntri ka tnad Koit ka Khiah ka jylla, Dr. Ampareen Lyngdoh.
Katkum ka jingong jong u, ha ka jingïakren ki la don bun ki jingpynshai ïa ki jingkylli ba wanrah da ki party bapher bapher haba ïadei bad ka roster system hadien ba la dep ban pynshai paidbah da ka Presentation.
“Kumta, ngi la rai ba khnang ban pyntikna ba baroh kin ïoh jingshai lut la tyrwa ban thaw ïa ka komiti ban khlieh da ka Myntri ka Koit ka Khiah Kong Ampareen Lyngdoh bad ki dkhot kin dei na ki party bapher bapher,” ong u Myntri Rangbah.
“Ngin sa ailad ïa ki ban pan jingshai bad ai jingmut ruh kumno ki kwah lane ai jigmut khnang ba ngin lah ban jam shakhmat,” u la bynrap shuh shuh. Nalorkata, u Myntri Rangbah u la pyntip ruh ba ka sorkar jylla ka la mynjur ruh ïa ka jingkyrpad jong baroh ki seng sainpyrthei ban pynsangeh shwa ïa ki jingthung kam kiba thymmai katba ka komiti kam pat phah ïa ka kaiphod halor ka roster system.
“Ngi la mynjur ba kum ka sorkar ngin pynsangeh shwa ïa kane ka kam tad haduh ba ka komiti ka la sngew hun bad aiti ïa ka kaiphod bad ka jingïakren kaba khatduh kaba ngi khmih lynti kan long noh khkam kloi,” u la ong.
Ha kane ka sngi u Myntri Rangbah u la pynpaw ruh ba hadien ba ki la dep ban ai ïa ka jingbatai kaba bniah lyngba ka presentation, jan baroh ki sengsaiñ pyrthei ki la pynpaw ïa ka jingsngew hun haba ïadei bad katei ka roster.
Kawei pat kaba u pynpaw ka long ba ki don ki party kina kwah ban kren ïa kiwei ki ishu nalor ka roster hynrei u la ong pat ba na ka liang ka sorkar ki la pynpaw ba ka jingïakren ha katei ka sngi kadei beit halor ka roster bad ym palat ïa kata.