Ha 9lad shah shoh arngut ki Khasi ba ñiah taxi, kem ki pulit ïa san ngut kiba don kti

0

Shillong, Jymmang 19: Ki arngut ki samla Khasi ïa kiba la tip kyrteng kum u u Banshai Syiem na Laitkor bad u Ïohborlang Kharsohnoh na Jongksha kiba ju kamai taxi, hynnin ka miet sngi Palei ki la shah shoh dusmnon ha ki bar jylla ha Khyndailad ha ka por 10 baje tam eiei.
Haba u Mawphor u la leit ban ïakren bad kine ki arngut ki lanot ha ka jaka ba ki shah sumar ha Civil Hospital, Shillong, ki la ïathuh ba wat la ki Pulit kiba don ha katei ka jaka kim shym la ïarap eiei ïa ki hynrei ki ai lad pynban ïa ki ban phet.
“Haba ki paralok ki pyrshang ban ïarap ki pulit ki pyntieng pynban kumba ki mut kawut lathi katba ïa ngi kim shym la ïarap eiei bad ki ai lad ruh ban phet krad kine kiba shoh beiñ ïa ngi,” ong u Ïohborlang Kharsohnoh.
Haba la kylli ïa ka daw ba ka jia ka jingshah shoh u Bah Ïohborlang Kharsohnoh u la ïathuh ba ka dei namar ba une udriver bar jylla u la hukum ïa u ban ieng kham sha khmat ba un ieng ha jaka ba u buh kali, ‘ynda nga ong ieng noh me ha khmat mar kumta ki la kurup ban shoh ban bom ruh da u bitor na khlieh jong ngi,” u la ïathuh.
“Ynda gi la shah shoh ym tang ki pulit kiba shu peit kai hynrei wat ki para Khasi ruh kim ïarap satia ki ïaleh pynban ban ring video bad kane kaba pynsngewsih eh ïa nga,” ong u Banshai.
Na ka liang ki para nongñiah kali kiba don ha katei ka jaka ki la ïathuh ba kine kiba shoh lada shu peit ki dei ki Punjabi bad u Bihari ‘ïa ka dur jong ki ngi kynmaw bha hynrei ïa u numbor kali te ngim kynmaw peit shuh,’ ki la pynpaw.
Lah ban sakhi ba tang hadien khyndiat por ba ka jia kane ka jingshah shoh na ka liang ki nongïalam ka synjuk ki nongñiah taxi bad ki nongïalam seng bhalang ki la poi sha Civil ban ai mynsiem ïa kine ki nongñiah kali.
“Ngi la ai jingmut ba ka KHADC ka dei ban pynthikna ba ki briew bym dei Khasi ki dei ban pynbiang ïa ki kot ki sla ba ki dei ban ïoh na ka konsil bad kumjuh ba ka sorkar ka dei ban talasi ïa ki kot ki sla jong ki namar ngi ïohi ba bun bah ki riewsniew na kiwei ki jylla ki wan rieh tngen ha ka kyrteng ka kam ñiah kali kamai bad na ka liang jong ngi ngi dawa ba ki bor ki dei ban shimkhia ïa kane,” ong u Bah Wandonbok Jyrwa.
Ha kawei pat ka liang, ki Pulit Special Cell jong ka East Khasi Hills District, ki la ïoh kem na Guwahati ïa ki 5 ngut ki runar kiba donkti ban shoh dusmon ïa kine ki arngut kat kum ka kyrwoh na Superintendent of Police ka East Khasi Hills Bah Sylvester Nongtnger u la ïathuh ba ka jingïoh kem ïa kine ki san ngut ka dei da ka jingïarap ki pulit ka Guwahati.
Ha ka jingtohkit, ki Pulit kila shem ba kine ki runar ba shoh ïa kine ki nongñiah taxi ki la phet krad sha Guwahati. Ki Pulit ki la pyntip marmar sha Guwahati bad da ka jingïarap ki Pulit kane ka Nongbah ka Assam, kila ïoh ban kem ïa 5 ngut.
Ïa kine ki 5 ngut la wan ïalam noh hynne hi ka sngi sha Shillong ban pynlong ïa ka jingtohkit kaba bniah.
Kane ka jingïohkem ki Pulit ïa kine ki runar kala wan jia ruh tang da ki kynta hadien ba ka Taxi Driver Association ka Khyndailad, ka la aipor 24 kynta ïa ka Tnad Pulit ban kem ïa kine ki runar lem kumta kin sangeh ïa ka jingkamai kali.
Na ka liang ki nongñiah taxi ha ka sngi Thohdieng ki la sahngeh ban kamai baroh shisngi kum ka jingpynbor ïa ka sorkar ban pynjur ka jingthwet ïa kine kiba don kti hynrei namar ka jingshimkhia ki Pulit ban thwet haban da ioh kem, ki nongñiah taxi ki la rai ban pynsangeh noh ïa ka jingthmu sangeh kamai.
Na ka liang ka seng ki nongñiah taxi hapoh ka shatri ka East Khasi Hills Local Taxi Welfare Association ka la rai ban khynra ïa labour license ïa ki nongñiah kali kamai bar jylla baroh ha ka sngi Nyngkong ban kyndang naphang ïa baroh ki bar jylla bym don ki kot ki sla kiba biang ban kamai.

 

Leave A Reply

Your email address will not be published.