Shillong, Jymmang 01: Ka Hynniewtrep Integrated Territorial Organisation (HITO) ha ka sngi Nyngkong ka la ther tyngeh ïa ka Achik Conscious Holistically Integrated Krima (ACHIK) halor ka jingkynnoh jong ka ba ka don ka jingshah pynduh ka bhah jong ki Garo da kaba la thung da kiwei pat ki jaidbynriew ha ka bhah ki Garo ha ka kam ba lait ha ka tnat Urban Affair jong ka sorkar jylla.
Haba kren sha ki lad pathai khubor u Presdent ka HITo u Bah Donbok Dkhar u la ong ba ka jingkam ka ACHIK ha ka shiti kaba ka la phah sha u Director ka Tnad Urban Affairs u Bah E Kharmalki ban dawa pynsahngeh ïa ka jingthungkam namar la pynduh ïa ka bhah ki Garo ka dei tang ka jingïalam bakla bad ka jingpyrshang ban pynshit jaidbynriew khlem ki jingshisha.
Ka ACHIK ka kam ba ha kane ka kam ba lait la bhah 13 tylli ki post na bynta ki Garo ‘ha ka jingshisha ki dei tang 2 tylkli katba ka ACHIK ka sngewthuh bakla ba tang namar ba khot interview ïa ki 13 ngut ki pyrkhat ki dei kiba la thikna ban ïoh kam beit bad nga kyntu ïa ki nongïalam ka ACHIK ban da wan jingtip bha shuwa ban kren namar ka long ka jingkren ai ding,” u la ong.
U Bah Donbok u la ong ruh ba hadien ba ka seng ka la wad jingtip bad ka la leit ruh ban ïa kynduh ïa u Bah E Kharmalki la lap ba kane ka post kaba khot interview ka dei kaba la lait naduh u snem 2019.
“Ha u 2019 ki don 16 tylli ki post kiba thylli bad la dep thung 10 ïa u Khasi Jaintia bad 4 tylli ïa u Garo bad 2 tylli kiba dang thylli mynta ka dei na bynta u Garo hi namar ba kidei ki kam ba sah thylli namar ba don kiba la shongthait,” u la ong.
U la ong ba ka ACHIK ka dei ban sahngeh mardor ka ïalam bakla ïa ki ar jaidbynriew kata ïa ki Khasi bad Garo ïoh kan poi shaduh u pud ban wanrah ïa kano kano ka jingjia bym sngewtynnad.
