Shillong, Jymmang 01 : Ka Achik Conscious Holistically Integrated Krima (ACHIK) kala dawa ïa ka Tnad Urban Affairs ka Jylla ba kan pynsangeh ïa ka hukum thungkam ïa ki briew ki bym dei ki Garo ha ka jaka jong ka bhah ki Garo.
Kane ka la mih halor ka jingshem ba kane ka Tnad Sorkar ka la thungkam ïa ki briew ki bym dei naka Jaidbynriew Garo ha ki kam kiba lah mang thik tang ïa ki Garo.
“Ngi pyrshah jur ïa ka jingthungkam ïa ki nongwadkam bym dei ki Garo ha ka jaka jong ki Nongwadkam Garo bad dawa ban pynsangeh noh ïa ka hukum DUA(U)E/29/2015/242 Dated Shillong, ka 24th Iaiong, 2023,” ong ka General Secretary ka ACHIK Adv Bernita R Marak ha ka shithi bala phah sha u Director ka Tnad Urban Affairs Bah E Kharmalki.
Ka Marak kala kynnoh “Ka shithi kala kren shai ba ki kam ba lait ki dei kiba la mang thik tang ïa ki Nongaplai kam Garo bad 13 tylli ki kyrteng jong ki nong aplai kam Garo lah dep ban phah sha ka Tnad ha ka shithi No. ORD.50/21(ST)/316-17 Dated Shillong, ka 14 Lber, 2022, ban leh ia kaba donkam na ka liang jong phi hynrei, phi shim ïa ka lynti ban pynkheiñ ïa ka aiñ bad thung ïa ki bym dei ki Garo ha ka jaka bala mang jong ki Garo kat kum ka aiñ”.
Ka ACHIK kala dawa ruh ïa u Director ban pynkylla noh ïa ka sienjam ba ula shim bad ong “..Kumjuh ruh namar ka jingïaleh pyrshah ïaka ïing bishar da kane ka kam wat hapdeng ki hukum ka ïing bishar bad ka Policy jong ka Jylla bad ruh kum ka jingpan map ïa ka Jaidbynriew Garo namar kane ka kam ba peitpoh ïa ka Jaidbynriew”.
Ka Marak ha kane ka shithi kala byrngem ruh ban rah ïa kane ka kam sha ki kyrdan kiba halor duh lada u Director um lah ban pynsangeh mardor ïa kane ka jingthungkam be-aiñ.
