Shillong, Jymmang 01 : Ka Bharatiya Janata Party (BJP) Meghalaya,mynta ka Lah Sngi U Blei, ka la dawa ïa ka Sorkar Jylla ba kan shim rai halor ka u snem ban pyntreikam ïa ka Roster System jong ka Reservation Policy ka Jylla.
“Ngi kyrshan ïa ka hukum ka ïing Bishar High Court halor ka cut-off-date hynrei ngim ong ban pyntreikam naduh ki snem ba la leit noh ne nangne shakhmat hynrei ngi kwah ba ka Sorkar kan shim ïa ka rai ka ban pynhun lang ïa baroh. Lada ym lah ka Sorkar, ka dei ban long da ka ïingdorbar Thaw Aiñ” ong u Convener ka BJP Committee halor ka Roster System u bah Himalaya Shangpliang haba ïakren bad ki nongthoh khubor.
Ula kdew ïa ka hukum ba la pynmih da ka ïing Bishar High Court jongka jylla ha 3 tarik Iaiong kaba ong “ Ka ïing Bishar ka shem ïa ka jingdonkam ban shim rai da ka sorkar ne rah sha ka jingïakren halor ka roster system hapoh ka ïingdorbar Thaw Aiñ ka Jylla”.
Ka ïing Bishar kala ong ruh ba kine ki dei ki kam policy kaba bha ban ïeh ha ka ïingdorbar Thaw Aiñ bad ki bor Synshar ka Sorkar bad hadien ba ki la shim ïa ka rai, kan sa long ka jingplie lad ïa ki nongshong shnong ba shah ktah ba kin buh jingkylli halor ka jingtreikam kat kum ki kyndon ka aiñ.
Haba kylli, une u MLA barim ka Mawsynram ula ong ba ai ba ka Sorkar ha ka kyrdan jong ka bad ka Kynhun Myntri kan shim rai halor kane ka kam.
Ula ïengskhem ruh ba ka BJP kam don eiei ban ong halor ka jingdawa ban bishar thymmai ïa ka State Reservation Policy bad ong “Ngim kwah ktah ïa ka kam ba ïadei bad ka Policy. Ngi kwah ban kren tang halor ka hukum ka ïing Bishar ba ïadei bad ka Roster”.
Ka Committee halor ka Roster System kala dep shong jingïalang haduh arsien. U Bah Shangpliang ula pyntip ba ka kynhun ki nongïasaid aiñ ba la khlieh da u SP Mahanta, ka la ai jingïarap ïa ka Committee da kaba ai jingmut halor ki aiñ.
“Ka Committee ka la shim ïa ki katto katne ki jingai jingmut ïa kiba ngin sa rah ynda u Myntri Rangbah ka Jylla u khot ïa ngi sha ka All Party Meeting” ula ong haba bynrap “ïa ki jingtip ba bniah halor kane ngim kwah satia ban ïathuh hangne namar ngi kwah ban buh na ka bynta ka jingïatai ha ka miej ynda la ïakynduh baroh ki seng saiñ pyrthei”.
Shuwa kane, u President ka BJP-Meghalaya Bah Ernest Mawrie ula pyntip ba ka Committee kan sa aiti ïa ka kaiphod halor ka Roster System. “Ngin sa shong bishar ïa ka kaiphod bad ngin sa rah hapoh ka jingïalang jong ka MDA” ula ong.
