Ka Election ba dang sahteng na Sohïong Assembly Constituency ba la pynsahngeh noh na ka daw jong ka jingkhlad noh u candidate ba la dep thep kyrteng na ka UDP na katei ka konstituensi, I Bah (L)HDR Lyngdoh kan long shen ha ka 10th May 2023 bad ka jingïañiew ïa ki vote pat yn pynbna ha ka 13th May 2023.
Ka jingïakawang ktieh jong ki party bapher bapher naduh kito ki por bad khamtam eh ha kane ka elekshon kaban sa long shen ka la shongshit bad iynnad bha. Ka jingïakawang ktieh kalong khamtam eh tang para party ba ïa synrop ne ïatrei lang haka sorkar MDA-2 ba la lamkhmat da ka party NPP. Ki nongïalam ka NPP ki la kop ïa ki nongïalam ka UDP ba, hana, ki khang horkit hordang ïa ki paidbah ban leit kyrshan ne thep vote sha ka NPP katba ïa lade pat (UDP-MLAs) ki bang bad sngewtynnad bha khop khop ban ïa kup lang ha kajuh ka nep syiad jong ka NPP ha ïing paki-dulan jong ka Secretariat..
Ym tang katta, hynrei ki NPP ki la kren jem daw ruh ïa ka UDP ba, lada ka dei shisha ka party ki ‘riew shynrang ba shisha, ka dei ban mih noh na ka sem MDA-2 khlem pynslem shuh namar ba ki la biang briew hi ha ka sem MDA-2. Lada kim nud ban mih pat, ki dei shisha tang ki khawpud bad ki khwan myntoi tang ban ïoh rieh tngen bad ïoh jingmyntoi na ka shuki(position) jong ka sorkar MDA-2.
Ha ka jingshisha,kat kata ka jingkren jem daw bad jingkren pynjah burom, ka kham bha bad kham don burom shibun ban mih hi noh ban ïa kaba shah beh noh la kum ki miaw ki ksew pynban. La kylla tad dor syndon ka longbriew manbriew hakhmat ki paidbah ba bun. La i tad dor ruh ka synshar ka khadar ha ka jylla jongngi mynta. Haduh katno eh ka syiad bad ka bang ka thiang eh ka shuki sorkar kat haduh bym tip ne sngewthuh shuh ïa ka jah burom ka khein burom.
Ki paidbah nongthep vote ha Sohïong ruh ki la kdang bad ngiah hi shoiñ ban sngap ïa ki nia elekshon jong ki party bapher bapher. Ki kular ban ai lut ïa ka bneng bad ka khyndew shwa ban thep vote. Ki juh hi ki briew kiba pynbang pynthiang ha ka bye eleshon ha Mawryngkneng bad Mawphlang ha kito ki snem.Ynda ki la jop pat, u MLA na Mawphlang um treh ïaleh elekshon shuh katba u MLA na Mawryngkneng pat u rem jah burom syndon ha u candidate ka VPP khlem poi pyrkhat satia. Kaba ima mynta kalong ba ïoh jop pynban u candidate ubym poi pyrkhat na Sohïong Constituency namar ka ktien ka ju ong, ‘Ha ka jingïakajia – majia (jingïakhun), uba bamsuk(uban jop) dei u poiei. Nang ïakhun u khla bad u sing, nang ïoh ei pynban u myrsiang ïa ka thong. Yn sa ïa peit ïa ka rai bastad jong ki paidbah nongthep vote ka Sohïong ïano kin pynjop ha ka sngi 10th Jymmang 2023 kaba dei ka sngi thep vote ban jied ïa u MLA jongki.
