Shillong, Jymmang 01: Ka Khun Hynniewtrep National Awakening Movement (KHNAM) mynta ka Lah Sngi U Blei ka la pynpaw ïa ka jingdonkam ban pynduh pyndam noh ïa ka jingpyntreikam ïaka MLA Scheme ha ka jylla.
Kane ka jingdawa ka KHNAM ka la mih hadien ba u Symbud Myntri Rangbah ka jylla u Bah Prestone Tynsong ula kren ha ka rynsan ïalap elekshon ha Sohiong constituency da kaba ong “Ka MLA scheme ka dei tang na ka bynta kito ki nongthep vote bad ki nongkyrshan kiba kyrshan ïa ka seng/kyrtong ha ka elekshon bad baroh ki 60 ngut MLA ki leh lang kumtei kumjuh hi”.
“Ka jingkren ka jongu (Tynsong) ka la pynpaw shai kdar ba ka T.12.5 Klut kaba ïoh da ki MLA ka dei tang ka jingai sngewbha jong ki politishan naka bynta ka kam saiñ pyrthei kaba long pyrshah ïa ki kyndon bthah jong ka Election Commission of India,” la ong u Vice President ka KHNAM u Bah Thomas Passah haka kyrwoh khubor.
“Haba peit ïa ka jingkren u Symbud Myntri Rangbah, ka long kaba dei ban pynduh noh ïaka MLA Scheme bad baroh ki kam pynroi dei ban pynïaid lyngba noh na ki ophis jong u BDO, Bor pynïaid District. Lyngba katei ka lynti yn lah ban pynthikna ba ka rukom pyntrei ïa ki kam kan long kaba biang, yn pyndep ha ka por ïa ka jingtrei bad ka ban don ruh ïa ka jingai jingkheiñ kaba khuid ba suba. Kane kan pynthikna ba ki nongkhaïi kin ym shah khring ha ki kam saiñ pyrthei ban leh ïa ki kam khaïi pateng” ula ong.
U Bah Passah ula pynkynmaw ba ka jingthmu jong ka MLA scheme ka dei ban pynbiang ïa ki jingdonkam ha ki shnong ki thaw, ban leh ïa ki kam pynroi na ka bynta ka jingmyntoi jongu paidbah bad ban weng ïaka jingleh shilliang khmat ha ka jingkyntiew ïa ka roi ka par bad kam dei satia ban kyntiew ïaka jingmyntoi ha ka kam politik kumba la leh ha ka jylla Meghalaya.
Ula ong, ba la sakhi ba bunsien ki MLA ki pyntreikam ïa kitei ki scheme kiba la pynlut na ka pisa u paidbah lyngba ka Committee kaba kila thaw bad khlieh hi da u MLA kaba ailad ïa ki ban bamsap lyngba kitei ki scheme.
“Haba ngi kren ïa ka MLA Scheme ha ki jaka sor, ngi la sakhi ba ka duna bha ka jingjop ha ka rukom pyntreikam ïa kitei ki scheme bad la trei shi trei ïa kajuh ka kam, namar ka jingpyntreikam ka long kaba torti bha bad ka la long ruh tang ka jingpynlehnoh ei ïa ka pisa u paidbah. Ngi la sakhi ruh ba ki MLA ki la pynlang ïa katei ka pisa baroh 5 snem bad pyndonkam tang ha ka shi snem shwa ka elekshon, kaba pyni shai kdar ba ki pyndonkam ïa katei ka scheme tang naka bynta ban myntoi ha ka kam saiñ pyrthei” ong u Nongïalam ka KHNAM.
