Shillong, Jymmang 01 : U President ka BJP Meghalaya u Bah Ernest Mawrie mynta ka sngi ula pynpaw ba u ïeh beit ha ki nongïalam kiba hakhlieh duh jong ka seng BJP na Delhi ban shim ïa ka rai la un dang bteng ne em ban shakri kum u President ka BJP ha Jylla Meghalaya.
“Nga la pyndep ban trei mynta 3 snem, hynrei ba ngan bteng ne ban sangeh ban trei kum u President, dei ban rai da ki nongïalam kiba ha khlieh jong ka seng” ong u Bah Mawrie haba jubab ïa ka jingkren u MLA ka BJP Bah AL Hek ba ka don ka jingthmu ban weng noh ïa u Bah Mawrie kum u President ka BJP ka jylla.
U Bah Mawrie ula pyntip ba u Myntri uba khmih ïa ka tnad ïada ri u Rajnath Singh ula pynbna ha ka jingïalang jong ka National Executive Committee ha Delhi ha ka 13 tarik u Kyllalyngkot 2023 ba ka samoi treikam jongu National President JP Nadda la pynjlan haduh ka 24 tarik u Jylliew 2024.
“Katba ki nongïalam kiba ha khliehduh kim pat pynbna ïa ka tarik ban pynlong ïa ka elekshon jong u National President, ngim pat lah ban pynlong ïa ka elekshon. U Bah Hek u lah bakla palat ban ai ïa katei ka jingkren,” ong u Bah Mawrie.
“Lada phi kynmaw u Bah AL Hek ula long u President ka BJP Meghalaya naduh u snem 2003 haduh 2006 kumta ka samoi treikam jong u President ka long 3 snem bad kam dei satia 2 snem kumba la ong u Bah Hek” ong u Bah Mawrie.
Haba kylli la un shim ïa ka jingkitkhlieh halor ka jingbym lah ka BJP ban leh bha ha ka MLA Election kaba la dep, u Bah Mawrie ula ong, “Ngi la leh bha bad ïakhun ha baroh 60 tylli ki Constituency bad ka jingïoh vote ka seng ruh kala kiew.Baroh ki kyrtong ki la trei shitom ban jop hynrei ka elekshon ka dei ka elekshon”.
Ula ong ba ka seng kala lah ban jop tang ha ki 2 tylli ki Constituency ka dei namar ba ki paidbah ka jylla kila jied ïa kiwei pat ki seng saiñ pyrthei.
“Ngi hap ban trei shitom shuh shuh ha Meghalaya hynrei ki paidbah kin sa babe ba kim shym la jied ïa ka BJP namar peit ïa ki kam pynroi kiba jia hapoh ka jylla Assam,” ula ong.
U Bah Mawrie ula kyntait ban kubur ba kala don ka jingïapait ïapra hapoh ka seng BJP bad ula ong “Baroh ki don ïa ka jingangnud bad ngin ym lah ban khang ïa kata”.
