Ba duna dawai ha ki jaka sumar pynpaw jingngewkhia ka BJP

Shillong, Jymmang 01: Ka Bharatiya Janata Party (BJP) ha ka sngi Balang ka la pynpaw ïa ka jingsngew khia kaba jur halor ka jingkyrduh dawai ha ki katto katne ki jaka sumar sorkar bad ka jingthut halor ka jingpyntreikam ïa ka skhim Megha Health Insurance Scheme (MHIS).
Haba kren sha ki lad pathai khubor u Nongaiktien ka BJP u Bah Himalaya M Shangpliang u la ong ba kane ka jingduna dawai ha ki jaka sumar ka sorkar ba kynthup naduh ki CHC, ki PHC kan ktah shibun ïa ki paidbah kiba shanaiah ha kine ki haka sumar ka sorkar ban ïoh ïa ki lad jingsumar haba donkam.
“Nga ïoh jingtip ruh ka don ka jingthud ka ha ka jingpyntreikam ïa ka Megha Health Insurance Scheme (MHIS) ha kiba bun ki jaka sumar bad na ka liang jong ngi kum ka party ka sngewdei ba ka sorkar kan shimkhia ïa kine kiba ktah ïa u paidbah ba duk ka jylla,” ong u Bah Himalaya.
U la ong ruh ka jingpynmih hukum ka sorkar pdeng ban ki khynnah kiba ïoh ïa ki jingbam teimet na ka sorkar pdeng ruh kin duh lada kim don Aadharr.
“Kane ka dei ka mat kaba hap ban hap shimkhia noh wut wut namar dei ki khynnah kiban shah ktah lada ki duh ki jingbam teimet tang na ka daw ba kim don Aadhaar bad kat kum ka jingtip jong nga lei kam pat don satia ka jingpynrung kyrteng Aadhaar ïa ki khynnah ha ka jylla,” u la ong.
Haba kren halor ka jingeh ki nongrep u Bah Himalaya u la ong, “Ka jinghiar dor u synsar ha une u snem uba mynta ka la ktah shibun bha ïa ka ïoh ka kot jong ki nongrep namar ha u snem uba la dep ka dor u synsar 1kilo u shongdor kumba 130 eiei hynrei mynta pat ka dor ka poi tang 90 eiei bad kat kum ka jingsngewthuh jong nga kam dei na kano kano ka daw ba u hiar dor hynrei ka dei namar ki mahajon ki pyrshang ban khñiot beiñ ïa ki nongrep,” u la ong.
U la ong ruh ba ka jingmih khubor ba ka don ka jingkyrduh sboh dawai ki nongrep ka dei kawei pat ka mat kaba ka sorkar bad ka tnat ka rep ka riang kin hap ban shim khia ban weng shisyndon.