Mawkyrwat, Rymphang 07: Ki lai ngut ki kyrtong ki ban sa ïa khun ha kane ka MLA Election 2023 na ka 35 – Ranikor Constituency mynta ka sngi ka 7 tarik u Rymphang, 2023 watla ka dei ruh ka sngi ba khadduh hynrei ki la ïoh ban pyndep ïa ka jingthep kyrteng jong ki ha ki Returning Officer jong ka South West Khasi Hills District.
Ki lai ngut ki kyrtong ki kynthup ïa u Tengsim G. Momin u ban sa ïa khun na ka Trinamool Congress Party (TMC), u Bichitro Hajong bad u bah Savio Phrangsngi Dkhar kiba dei ki kyrtong shimet.
Haba kren ha ki lad pathai khubor kitei ki kyrtong ki ban sa ïa khun napoh ka 35 – Ranikor Constituency ki la pynpaw ka jingsngewkmen ban ïoh ban pyndep ïa ka jingthep ïa ki kyrteng. Ha kajuh ka por ki la paw ruh ba kane ka jingïakhun jong ki mynta ka kynti ka long beit ba ynda ki poi sha ka thong jong ka jingjop kin lah ban wanrah shibun ki lad pynroi hapoh jong ka konstitwensi namar ka Ranikor ka long ka konstitwensi kaba dang sahdien ha kiba bun ki liang.
Namarkata, ki la buh ïa ka thong ba khmat eh ba lada ki jop ki kwah ban pynbiang ïa ki jingdonkam jong ki paidbah kata naduh ki jaka sumar nyngkong, ki lynti ki synkien khnang ba kan kham pynsuk ha ka leit ka wan, ki jaka pule kiba biang namar ki samla pule ki donkam bad kiwei de ki lad pynroi kiba long ka jingmyntoi ym tang ïa ki shimet hynrei na ka bynta ka dong ka thaiñ baroh kawei.
