Thep ïa ka 3 lak tyngka ba la mang sha ki khynnah rit ba shah thombor kum ka Fixed Deposit bthah ka HC

Shillong, Naitung 5 : Ka ïing Bishar High Court jongka jylla ha ka Sngi Thohdieng ka la bthah ba ïa ka 3 lak tyngka ba la mang na ka bynta ki khynnah rit ba shah thombor kiba dang hap hapoh ka aiñ POCSO dei ban thep ha ka Bank kum ka Fixed Deposit ha ka kyrteng jong kato ka nongshah thombor tad haduh ba kan da dap 25 snem ka rta sa shah ba kan sei lut ïa ka pisa ba kan pyndonkam ha kano kano ka kam ba ka kwah ban leh ne seng. Hynrei katba dang don hapoh ka 25 snem dei ban shah ban sei tang ka sut kata ruh shisien lai bnai.
Ka Chief Justice ka Revati Mohite Dere ka la bishar bha ïa ka kaiphod ba la ai ha ka 26 tarik Jylliew da u Secretary District Legal Services Authority , East Khasi Hills.
Ka Victim Compensation Committee ka la rai halor kane ka pisa ban ïarap ïa kito kiba shah thombor ha ka 12 tarik Jylliew mynta u snem kat kum ka Meghalaya Victim Compensation Scheme 2022.
Hadien ba la mynjur da ka MSLSA bad ai noh sha ka DLSA, Shillong ïa kane ka pisa yn thep beit kum ka Fixed Deposit ha ka kyrteng jong kaba shah leh thombor tad haduh ba kan da dap 25 snem ka rta. Hynrei kan ïoh pat ban sei ïa ka sut shisien man la ka lai bnai.
Ka ïing Bishar ha ka rai ba la shim ha ka 7 tarik Jymmang 2026 ka la jer haduh 15 tylli ki skhim ban ïoh jingmyntoi kaba shah thombor ryngkat bad lai ngut ki khun jongka bad kine ki long Nirbhaya Fund, Mission Vatsalya, Beti Bachao Beti Padhao, Ayushman Bharat-PM-JAY, Meghalaya Health Insurance Scheme, and NALSA’s child-friendly legal services scheme. Ka la bthah ruh ia u DCPO bad DLSA ban pynleit skul biang ia ka ruh ha ka skhim “ Back to SChool Scheme”.
Hynrei ha ka jingbishar bniah ka ïing Bishar ka la lap ba kawei ka skhim kam treikam shuh na ka bynta kane ka nongshah thombor bad kata ka dei ka Mission Vatsalya hynrei wat la katta ruh ka lah ban ïoh pat na ka bynta u khun ba saw snem shiteng hadien ba la pynbiang ïa ki kot ki sla. Na ka bynta bynta i khun rit ba dang hynriew bnai i dang ïoh ïa ka Mission 1000 Days Meghalaya skhim na ka bynta ka jingtip ba bniah la phah sha DMHO bad ICDS Cells. La phah ruh ïa ki jingtip ba bniah shaphang kane ka nongshah thombor sha ka Chief Minister’s Safe Motherhood Scheme.
Wat la kane ka nongshah thombor ka la pynpaw ha ka DLSA ba ka kwah ban dang leit skul biang bad laïiarap ïa ka ba kan ïoh rung skul ha ka skul ba jan tam hynrei ka SSA Block Mission Coordinator ka la pyntip ba kam shym la wan thikna sha skul.
La lap ba kane ka nongshah thombor kam don ka ST Certificate bad donkam ruh ban pynbeit ïa ka kyrteng jongka ha ka Birth Certificate. Ki khun jongka ruh kim don ki Birth Certificate, ST Certificate bad Aadhaar Card ruh.
Na ka liang ka DLSA bad DCPO Unit ki la ïarap ban pynïoh beit ïa ka Birth Certificate jongka bad kumjuh ruh ban pynïoh ïa ki kot ba donkam. Kam lah ruh ban leit sha ka One Stop Centre hapoh ka Mission Shakti namar i khun jong ka i mih niangpyrsit. Hadien kane ka la kwah ban leit hikai suh jaiñ noh bad na ka liang ka DCPO Unit ka dang ap lano kan lait ban pynrung ïa ka ha ka jaka ban ïoh jinghikai.
Na ka liang ka Chief Justice ka dang pan kaiphod biang da u Secretary DLSA ban tip kiei ki jingmyntoi ne jingïarap ba kane ka nongshah thombor bad ki khun jong ka ki la ïoh kat haduh mynta. La bthah ïa u Registry ban phah ïa ka hukum sha ki bor ba dei khmih ba kin tip ïa kaei ba kin leh.