Lada ki kam ki bun tang ka jingkdew kti bad pynhap Syiem ka wanrah ka ïa ka jingartatien noh: SRSNP

Shillong, Naitung 5: U President ka Synjuk ki Rangbah Shnong Nongthymmai Pyllun (SRSNP) u Bah Bantylli Nari u la pynpaw ba ka jingtuklar than jong ki District Council ïa ki Dorbar Shnong, ki Dorbar Raid, ki Dorbar Hima bad ki Dorbar Kur kam itynnad bad kan wanrah ka jingpyn artatien noh.
Haba ïa kren bad u Mawphor u Bah Bantylli Nari u la ong, “Ka jingmih jong ka Voice of the People Party (VPP) ka mih, kum ka jingai mynsiem ïa ki paidbah nong shong shnong ba kan wan ka jingsynshar kaba khuid hangne hapoh ka jylla ka jong ngi bad baroh la iohi shisha ha ka election MP bad MDC election”.
U Bah Nari u la ong, “Mano kiba ym kwah ban iohi ïa ka jingsynshar kaba khuid bad baroh kiba kwah ïa kata, hynrei haba nga peit pat ïa ka kam ba ki trei mynta ka pynartatien noh namar ba kine kiei kiei ki long ki bym itynnad ban tuklar than ïa kata ba kyrshan ïa phi”.
Shuh shuh u la ong, “Ki Dictrict Council ka ïeng haduh mynta ba don ki Dorbar Shnong, ki Dorbar Raid, ki Dorbar Hima, ki Dorbar Kur bad kaba kongsan eh ki District Council kadei ban kdup bad ban thaw ki aiñ na ka bynta jong ngi kum ka jatbynriew, hynrei lada ka kam jong ki ka bun tang ka jingkdew kti ne ka jingpynhap Syiem bad ka jingtuklar ha ki kam bad ka khyndew ka shyiap bad ka jingpynduh bor ïa ki Dorbar Raid, Dorbar Hima ba kin ym don bynta shuh ïa ka jingshakri ka jong ki bad kane ka long kaba ktah shisha”.
Ka system kaba ngi don kadei kaba skhem bad kaba bha bha namar balei, lada ka sorkar India bad ngam kren ïa u riew shimet hynrei nga kren ïa ka sorkar India lada ka donkam ban thied jaka hangne kam lah ban shu thied na surok bad kadei ban ioh shwa na NoC na ka Dorbar Shnong da lah dep na shnong leit sha ka Dorbar Raid lane Dorbar Hima ban ioh biang sa kawei ka NoC bad ki submit pat ha DC Office Revenue, ong u Bah Nari.
Na ka liang u DC Revenue u phah pat ïa ka shithi sha ka District Council ban ïa ka shithi jong ka jingsngew, ki don ki NoC ba la ai da ki Dorbar Shnong ki Dorbar Raid bad na ka Dorbar Hima bad ha ka por ba ki pan ka shithi jong ka jingsngew na ka District Council ka pynsangeh bad kam ai bad kane ka long ba itynnad bad u la ong ruh ba ki shipai mynta ki wad jaka hynrei ym don kawei ka dorbar shnong ban ai jaka.
U Bah Nari u la ong, “Te hynrei lada pyntlod bor ne knieh noh ïa kata ka long ba phi pynkhein, ïa mynta phim pat sngewthuh hynrei kaei ka ban jia ïa ki khyndew Raid, ha sor Shillong kam da ktah eh hynrei lada ngi kren tang shi tda maw kum ha Mawkasiang shatei ki bun ki Dorbar Shnong kiba dang bun ki jaka lajong, ki Dorbar Raid kiba don jaka lajong, ki Dorbar Hima kiba don jaka, hato phi ban pyntikna ba kine ki jaka ba kan peit hi tang ki District Council ba kin ym jah”.