Thaw ka Sorkar Jylla ïa ka Expert Committee ban khmih bniah halor ka Reservation Policy

Shillong, Jylliew, 01: Ka Sorkar Jylla ha ka sngi Palei ka la thaw da ka Expert Committee ka ban shong bishar thymmai biang halor ka Reservation Policy lane ka Bhah Thungkam Thungjam.
Ïa kane la pyntip da u Chief Secretary ka Jylla u Bah Donald P. Wahlang ba la pynmih lyngba ka tnat Personel & A.R (B) ka Sorkar Jylla.
Ka jingpynbna ka ong, “u Lat ka Jylla u sngewbha ban pynbna ïa ka Expert Committee ka ban khmih bniah ïa ka State Reservation Policy kumba la pynbna ha ka Resolution PER.222/71/138 ba la pynmih ha ka 12 tarik, Kyllalyngkot, 1972.”
“U lane ka Chairperson bad ki dkhot jong ka Committee kin kynthup ïa ki stad ki jhad ha ka Constitutional Law, Economics, Sociology, Demographic Studies, bad kiwei kiwei ki bynta kiba ïadei ïa kiba yn sa pyntip da ka sorkar jylla,’ la ong ka jingpynbna.
“Ka Expert Committee kan sa shong bishar biang ïa ka State Reservation Policy da kaba shim ïa ki jingai jingmut na baroh ki kynhun bad da kaba leit sorjamin sha baroh ki bynta jong ka jylla,” la bynrap ka jingpynbna na u Chief Secretary.
Kum ban shu pyntip hangne, ka Sorkar ka la thaw ïa ka Expert Committee shi sngi hadien ba ka Committee ba la khlieh da ka Myntri Sorkar ka Dr. Ampareen Lyngdoh kum ka Chairperson kaba kynthup ïa baroh ki nongmihkhmat na ki Seng Sainpyrthei kaba la shong jingïalang ha ka sngi Balang ka la phah ïa ka jingai jingmut sha ka Sorkar Jylla ban thaw ïa ka Expert Committee ka ban shong bishar biang halor ka Reservation Policy.