Pyntreikam ka DC da ki Odd-Even Number ïa ki kali kamai ban rung sha 9-Lad bad Motphran

0

Shillong, Jylliew, 01: Ka District Magistrate jong ka East Khasi Hills District, ka Kong RM Kurbah, ha ka sngi Palei ka la pynbeit thymmai da da ki Odd bad Even Number na ka bynta ki kali kamai, kata, ki STPS Bus, SSPTS-Maxi Cab bad ki local Taxi rong iong & stem) ban rung sha Khyndai Lad bad sha Motphran kiba long ki kad khaii kiba thnem bha ka leit ka wan bad thied ka pet jong ki paidbah.
Ka jingpynmih ïa kane ka hukum ka long namarba ka jingrung jong ki kali kamai sha kine ki ar tylli ki kad khaii ka la pynsuhsat haduh katta katta ïa ki Pulit pynïaid kali bad buh jingma ruh ïa ka leit ka wan jong ki paidbah namar ka jingkhapngiah.
Ka District Magistrate ka la pyntip ba ki kali kiba don ïa u Registration Number uba kut ha u 1,3,5,7,9 la shah ban ïaid tang ha ki sngi Lah Sngi u Blei, sngi Balang, bad sngi Thohdieng, katba ki kali kiba don ïa u Registration Number uba kut ha u 0, 2,4,6,8 la shah ban ïaid tang ha ki sngi Baar, sngi Palei bad sngi Saitjain. Kane ka hukum kan ym treikam satia ha ki sngi U Blei.
Shuh shuh, manla kawei pa kawei ka kali ka dei ban don ïa ka High Security Registration Plate (HSRP) bad ka kopi jong ka Registration Certificate dei ban pyni ha ka por ba don ka jingtalasi kali ha kano kano ka por. Lada lap ïa kino kino kiba ñiah ïa ki kali ba la sniew ki number plate kin shah pynshitom katkum ki kyndon jong ka aiñ bad kynthup ruh ka jingpyndam noh wat ïa ka laisen ñiah kali.
Kane ka hukum kan kynthup ïa ka jingbthah ba la pynmih da u Chief Executive Officer, Shillong Municipal Board ha kaba ïadei bad ka jingïaid jong ki SSPTS-Maxi Cab katkum ka shithi No. SMB/PW/121/2013-14/230-34 ba la pynmih ha ka 30 tarik, Jymmang, 2023.
Namar ka jingkyrkieh jong ka kam, kane ka hukum kan treikam noh mardor naduh ka 5 tarik Jylliew, 2023 tad haduh ban da pynbna da kumwei pat.

Leave A Reply

Your email address will not be published.