Hapdeng ka jingjaw ummat, ka jingduwai bad jingkmen leit phai ïing noh u Bah Ardent

Shillong, Jylliew 01: Ka por 11:00 baje mynstep ka 1 tarik u Jylliew 2023, ka lah ban long ka khyllip mat ka ban thaw histori ha ka jylla, namar dei ha kane ka por ba u ophisar jong ka sorkar jylla, u Bah Ronnie Wahlang, u la wan ha ka jaka ba shah thngan u Bah Ardent Miller Basaïawmoit ban wanrah ïa ka shithi ne ka Notification na ka sorkar jylla bala pynmih da u Lat kaba pyntip ba la thung ïa ka Expert Committee ban review noh ïa ka Reservation Policy.
U Bah Ronnie u la leit phai noh bad u Bah Ardent u la plied ïa ka Envelop. Ha kane ka por don tang khyndiat ngut ki briew, kynthup ïa ki katto katne ki nongïalam jong ka VPP bad ki Volunteer. Baroh ki la shu ïapeit lyngngoh katba u Bah Ardent u dang pule ïa ka Notification ryngkat ka jingjaw ummat. Hynrei kim dei ki ummat jong ka jingsngewsih, pynban ki dei ki ummat jong ka jingkmen, namar ki jingthoh kiba don ha ka Notification ki dei beit thik kumba kwah ka VPP bad u paidbah jong ka Ri ban thung ïa ka Expert Committee ban review ne pynbha noh ïa ka Polisi bhah kam kaba la treikam la palat 50 snem.
Sa shiphang kiba don ha katei ka por ki la kmen ban khublei bad kdup ïa u Bah Ardent, namarba ha ki ka ladei ka jingjop kaba nyngkong.
Ka khubor ka la pur sted sha kiwei ki nongïalam ka VPP ki bym don ha katei ka jaka bad bun ki la wan mareh kyrkieh haba ki la ïoh sngew ïa ka khubor babha. U Bah Ardent kum u briew uba la ïoh ïa ka jingieit u paidbah, um sngewdei ba kat ïa kane ka jingjop un shu kmen hi marwei. Kumta ha ka por 12:00 baje mynsngi la pynbna lyngba ka Youtube ban wer ïa ki paidbah ban wan sha jaka ba u shah thngan ha ka por 2:00 baje noh phai sngi ban pynbna ïa kane ka khubor jong ka jingjop.
Ha ka por 2:00 baje nohphai sngi thik u paidbah u la sdang ban ïalum ha ryngkat ka jingpyntem ïa ki sur jingrwai ieit ri. Ha ka por 2:30 baje nohphai sngi ka surok hajan ka ophis Addl.Secretariat ka la shlei smam da ki paidbah kiba la wan mareh kyrkieh ïa kane ka jingkhot na u nongïalam.
“Ngam kwah ban shim ïa ka burom sha lade namar kane ka jingjop, hynrei ka burom ka leit sha U Blei U ba don ryngkat naduh kaba sdang bad sha phi ki paidbah kiba la kyrshan ïa kane ka jingïakhun jong ngi”, la ong u Bah Ardent hapdeng ka jingthap kti bad ka jingrisa jong u paidbah.
U Bah Ardent uba la kren da kaba shu shong, u la bteng ïa ka jingkren jong u da kaba ong, “Nga la shah thngan 221 kynta bad namar ba ka jingdawa jong ngi, ka la urlong ngan sangeh noh ka jingshah thngan ban leit phai noh sha la ïing”.
Ka Kurim jong u, ka Kong Palma Manih, ka la mih na kyndong ban rah ïa ka Tiffin bad ka shamoit ban pyntian ja ïa u. La thap kti shaw bad risa ki paidbah bad la ïohi ruh ba la don kiba ïam katba u Bah Ardent u dang taw ïa u soh khaw ja ba nyngkong eh hadien 10 sngi.
Hadien kane u President ka VPP u la dem ban ban duwai ainguh ïa U Blei hapdeng ka jingsngap jar jong u paid byllien uba ïeng hapdeng surok khlem khih, ha ki phyllaw, ha ki jingkhang ïing bad ha ki tnum jong ki ophis Sorkar bad don kiba kiew halor tnat dieng ban ïohi kham bha ia kaei kaba la jia.
“Kane ka dei ka jingjop jong ka VPP bad jong ka jaidbynriew hi baroh kawei”, u la ong da kaba ai khublei bad pynpaw ka jingsngewnguh ïa ki paidbah kiba la wan khublei, ai mynsiem bad synran ïa u ha ki sngi ki miet ba u shah thngan hajan ophis Addl. Secretariat.
Hadien shi kynta tam ba la wai ka jingïalang, u Bah Ardent u la mih noh na ka jaka shah thngan bad tang hadien shi kynta bad ki paidbah ki dang ïa ap bad khublei ïa u haba u mih na katei ka jaka da kaba shong da ka kali Bolero rong lieh ban leit phai sha la ïing.
Ka Notification ba la pynmih da ka Sorkar Jylla ka ong ba ha kane ka Expert Committee yn kynthup ïa ki riewshemphang ha ka laiñ jong ka aiñ, ka imlang sahlang, ka ïoh ka kot, na ka laiñ jingkheiñ briew bad kiwei kiwei de ki laiñ.