Nongstoiñ, K’lyngkot, 03: Ka jingthang dusmon ïa ki lum bad ki khlaw ki btap da ki riew shim kabu ka la sdang naduh u bnai ba la dep ter ter haduh kine ki sngi bad ka la buh ïa ki ïing ki sem kiiba don hajan ki klaw ha ka jingma.
Dang ha kane ka janmiet sngi thohdieng ha ka por kumba 6.25 minit ei ei ki riew shim kabu ki bym lah ban tip, ki la thang dusmon ïa kawei ka jaka ha Mawlumïang kaba dei ka kyntoit jong ka shnong Mawïawet West Khasi Hills ha kaba ka thylliej ding ka la klang bha.
Ki la don ki nongshong shnong kiba don ïing hajan katei ka jaka bad ki la ïohi ïa ka jingklang ka thylliej ding bad ki la ïa pyrta shla bad khot ïa ki para mar jan ban leit pynlip. Ha katei ka por ki longïing kiba don ha katei ka thaiñ ki la ïamih lut bad shynrang bad kynthei bad khynnah ban pynlip ïa katei ka ding.
Don bok ba ha katei ka janmiet ka lyer kam da jur satia bad ka la dei ruh ka por ba ka suiñ bneng ka la sdang hap umjer bad ka ding kam da khlaiñ shuh kumba long ha ka por mynsngi bad da ka jingïatrei shitom lang jong ki la lah ban pynlip noh.
Na ka liang rangbah bad ki long kmie jong katei ka kyntoit ha ryngkat ka jingiatrei lang bad ka dorbar shnong Mawïawet, ki la buh ïa ka jingmaham kaba tyngeh ïa kito kiba mlien ban thang dusmon ïa ki lum bad ki khlaw ki btap, kiba pynjot ïa ki jingshna ba la ai da ka sorkar, kiba pom pathar ïa ki dieng ki siej bad pynïap dusmon ïa ki sim ki doh ki doh um doh wah bad kiba leh ïa ki kam kiba pyrshah ïa ki kyndon pynïaid shnong.
Ki la ong ruh ba lada lap ïa kino kino kiba pynkheiñ ïa kitei ki jingmaham yn ym don jingmap bad kiba ju mlien ban leh ki dei ban kynmaw ba ka jingpynshitom ïa ki ka la ap lypa lada ki lada ki ïaleh pyrshah.
