Shillong, K’ Lyngkot 03: U President jong ka Kutumba Surakshya Parishad (KSP) u Satya Ranjan Borah ha ka sngi Thohdieng u la ong ba ki Ïingmane kim dei ki jaka ban pyrta “Jai Shree Ram”.
Haba kyrpad ïa ki paidbah ban burom ïa baroh ki niam, u Borah u la ong, “Manla uwei pa uwei u don ka hok ban im, ban mane bad ka hok ban pynpaw bad nga tharai hajuh ka por ka ri India ka dei ka ri kaba shah ban mane laitluid, manla uwei pa uwei u nongshong shnong u hap ban burom ïa baroh ki jingngeit, baroh ki niam, manla ki jaitbynriew bad ki kynhun. Ki Ïingmane kim dei na ka bynta Jai Shree Ram.”
Ïa kane u la kynthoh ha ka jingjia kaba dangshen hapoh ka Ïingmane kaba ha ka shnong Mawlynnong, kaba dei ruh ka shnong kaba khuid tam ha Asia.
“Ki dei ban don katto katne ki jingpyrta kiba kyrpang. Ki dei ban burom Ïa ka Ïingmane ne ka Balang bad kumjuh ruh ki Balang ki hap ban burom ïa ki mandir, ki jaka mane blei ne temple bad kidei ruh ban burom ïa ngi naba ka jingburom markylliang ka long kaba kongsan. Ym lah ba kan long tang shilliang,” ong u President ka KSP.
“Kumta baroh kidei ban burom kaei kaba don hapoh ka Ïingmane bad baroh ki Ïingmane ne Balang ki dei ban ruh ïa kaei kaba don ha ki temple ruh kumjuh,” u la pynpaw bad kynthoh.
