Tdot khlem ailad u Chairman ïa ki MDC Liang Pyrshah ban ïatai halor ka mang tyngka

Shillong, Jylliew 26 : Ki MDC jong ka Liang Pyrshah ki la pynpaw ïa ka jingsngewsih kaba khraw ha kane ka sngi Palei hadien ba ym don iwei ruh na ki ban ïoh lad ban ïa shim bynta ha ka jingïatai halor ka mangtyngka ha kane ka sngi ba khatduh jong ka Dorbar Mangtyngka.
Na ka liang u Nongïalam ka Liang Pyrshah, Bah Titos W Chyne haba kren bad ki lad pathai khubor u la ong ba kane ka long ka jingjia ka bym lah satia ban pdiang. U ong ruh ba ka dei ruh ka jingjia kaba ym pat ju jia la ka long hapoh Ïing Dorbar Thawain ka jylla ne wat hapoh Ïing Dorbar Thawain jong ka District Council ba ki dkhot kin ym ïoh lad ban shim bynta ha ka jingiatai halor ka mangtyngka.
Kane ka jingbym ïoh lad jong ki ban ïatai ka la pynlong ïa ki ban mih noh napoh Ïing Dorbar iwei hadien iwei pat haduh ba la sah sa tang ki MDC jong ka Liang Synshar ban ïatai halor katei ka mat.
“Haba ong general discussion kaba mut lah ban ïatai ïa kano kano ka bynta kaba ïadei bad ka mangtyngka khamtam haba ïadei bad ka jingkren halor ka mangtyngka (budget speech) jong u Executive Member ka tnad Finance uba la wanrah ïa kane ka mangtyngka,” ong u Nongïalam ka Liang Pyrshah, Bah Titos W Chyne.
Ha kawei pat ka liang, u Bah Titos u la pynpaw ruh ka jinglyngoh ba u Chairman u da buh ka tarik ba khatduh na ka bynta ban ai kyrteng. “Ban ai kyrteng na ka bynta ki cut motion ka don da ka por namar ngi sngewthuh ba ki tnad ki hap ban pynkhreh ïa ka jubab. Hynrei haba ïadei bad ka jingïatai paidbah halor ka mangtyngka, u EM Finance u dei ban pynshai ïa kino kino ki mat kiba wanrah da ki dkhot. Ka Rule 115 ka kdew shai ba ki dkhot jong ka Ïing ki ïoh laitluid la ka long na ka liang synshar ne na ka liang pyrshah ruh ban ïa shim bynta,” bynrap shuh shuh u Nongïalam ka Liang Pyrshah.
U Bah Titos u la ong ba ka long ruh kaba sngewsih ba u Chairman u khlem ailad satia ïa kane bad ai ruh ïa ka rai ban ym ailad hi tdot. “Hynrei ngi ju ïohi ba ha ki por ba la dep, ba wat lada ym ai kyrteng hynrei lada dang don ka por , ki dkhot ki lah ban ieng ban ïa shim bynta. Ka jingïashim bynta ha ka budget kam mut eh ban ïa wad daw wad dong bad kam mut eh ban pyrshah hynrei ka jingthmu ka long ba ka budget speech ka kdew ïa ka polisi jong ka Executive Committee. Kaba mut haba kren ïa ka polisi kaba dei na bynta baroh shisnem bad kiei ki kam ba ka EC kan leh na ka bynta ka council hi baroh kawei bad na bynta u paidbah.
Hynrei, u la ong pat ba ka jingjia mynta ka sngi pat la khanglad sbak ïa ki khlem ailad ban kren halor ka nongrim ba u Chairman u la dep ban pynbna ha ka sngi sdang ba kin phah ïa ki kyrteng. “Kane ka long kaei kaei kaba ym pat ju jia bad ngim lah satia ban pdiang ïa kane bad kumta ngi kyrmen ba kan ym jia shuh ha ki por ban sa wan.”