Tang ki paidbah khappud kiba sngewthuh ïa ki jingeh u pud u sam bad ka Assam: K.P.Pangniang

Nongstoiñ, Nailar, 21: “Watla ki ar ngut ki Myntri Rangbah jong ki ar jylla ka Meghalaya bad ka Assam, ki la dep ban ïa soi ïa ka soskular jong ka jingïapynbeit pud hakhmat u Amit Shah Myntri kam pohïing ka sorkar pdeng, hynrei na ka liang ki paitbah jong ki shnong khappud kim pat hun satia katba kim pat pynshisha da kaba sieh ïa ki mawpud ba thikna”, ong u bah K.P.Pangniang.
U bah Pangniang haba ïakren bad u nongthoh khubor u la ong ba ha kaba ïadei bad u pud u sam, bun na ki paitbah kim sngewthuh haduh katno ka jingeh bad ki pyrkhat ruh ba ka dei ka kam kaba suk hynrei kam long kumta. U la ong ruh ba ym tang ki riew paitbah kiba ong ba ka dei kaba suk, hynrei ki nongïalam jong ki seng saiñ pyrthei bapher bapher hapoh ka jylla ruh, ki kren ïa ki juh ki kyntien tang ban pynbiej ïa ki paitbah, hynrei kim sngewthuh pat de haduh katno ka long kaba eh, namar ki dei kiba shong ha ki jaka ki bym don kano kano ka jingïa kajia pud bad kiwei pat ki jylla.
U la ong ruh ba u nud ban kren ïa kata namar ba u dei u nongshong shnong ha khappud bad u dei ruh u ba mad ïa katei ka jingeh naduh ba u dang khynnah. Ha kajuh ka por u la ong ba lada ki nongïalam jong kiwei pat ki seng saiñ pyrthei ki ong ba ka kam pynbeit pud ka dei kaba suk, u nud ban ong ba ka jingïoh ïa ka jylla ba pura ka la kynjoh sha ka sanphew snem, hynrei kim lah pat ban pynbeit bad ki pynlong sohpdung pat ïa ki paitbah nongshong shnong ha ki pulit ka Assam.
U la buh jingkylli ruh ba lada ki la trei shitom na ka bynta ban pynbeit ïa u pud u sam, ki dei ban sei ïa ki jingshisha da kaba pyni katno tylli ki memorandum ki la thoh sha ka sorkar pdeng, ban pyntip halor ka jingeh ba ki paitbah ha ki shnong khappud ki ïakynduh.
U bah Pangniang u la ong ruh ba naduh ba la ïoh ïa ka jylla ba pura, u (L) bah Hopingstone Lyngdoh bad ka HSPDP ki la dawa na ka por sha ka por bad da ki hajar sien u (L) bah Hopingstone Lyngdoh u la dawa hapoh Assembly hynrei kim sngap satia. Nalor kata u la ong ruh ba ka daw kaba kongsan jong ka jingbym don ïa u pud u sam, ka dei namar ba ha ka por ba ka sorkar India ka la ai ïa ka jylla ba pura, kam shym la kdew satia ïa u pud u sam bad wat la ki MLA ka HSPDP ki ïai dawa na ka por sha ka por ruh ka sorkar kam sngap namar ba ki don ha ka liang pyrshah.
Ha kaba ïadei bad ka jingïapynbeit pud kaba dang ïaid mynta, u la ong ba ki hynriew tylli ki jaka ïakajia kiba ki Regional Committee on Border Dispute kim pat sdang ban jurip, kata ka Block I Block II ba kynthup ruh ïa ka Langpih sector, ki dei ki jaka ïakajia kiba eh tam ban pynbeit.
Hynrei kumba u Himanta Biswa Sarma Myntri rangbah ka Assam u la pynsngew ha ka khat hynriew tarik Naiwieng jong u snem ba la dep ha ka jingïalang kaba la long ha Langpih, ba ka jingïapynbeit ïa u pud u sam yn pynshong nongrim katkum ka jinglong jong ki jaka, ki nongshong shnong bad ka riti ka dustur, u don ka jingkyrmen ba kan long kumta.
Ha kajuh ka por u la ong ba ka jingeh ban pynbeit ïa ka Langpih sector ka dei namar ba ki Nepali kiba wan buhai shnong ha katei ka thaiñ ki kwah ban leit sha Assam. Wat la katta ruh u kyntu ïa ki nongsynshar la ki dei ki Syiem, ki sordar ne ki riew rangbah, ba ha kaba kum kane ka por ki dei ban ieng tylli kawei, ban dawa shuwa ïa u pud u sam uba biang bad ban ym shah ba ka Assam, kan shu leh katba ka mon bad lada la lah ban pynbeit ïa u pud u sam u ba biang, ïa ki Nepali yn sa ïakren hadien.
U bah Pangniang u la kyntu ruh ïa ki paitbah ba kin ïeng tylli ban ïakhun na ka bynta ka hok la jong bad lada kan long ha kano kano ka rukom ruh, kin ym sheptieng hynrei kin ieng skhem bad kum u nongïalam jong ki un ym salia wat lada kan poi ha uno uno u pud ruh.