Tang ka NPP marwei ka lah ban synshar marwei ïa ka Jylla: Prestone

Shillong, Nailur 01 : U Bah Prestone Tynsong uba dei u Symbud Myntri Rangbah uba dei ruh u state President ka National People Party (NPP) Meghalaya, ha ka sngi Ba-ar, ula ong ba ka Sorkar Meghalaya Democratic Alliance (MDA) kam don jingma satia ïa ki khubor ba ki 9 ngut ki MLA ka UDP ki don jingthmu ban leit ïasoh sha ka BJP.
Haba ïa kren bad ki lad pathai khubor hadien la wai ka jingialang ban rakhe ïa ka jingdap 14 snem jong ka jingseng ïa ka party kaba la seng ha u snem 2012 u Bah Prestone u la ong, “tang ka NPP marwei ka don bun paid eh bad ka lah ban synshar marwei ïa ka Jylla”.
U Bah Prestone ula ong ba ula iohi ïa ki khubor tang ha ki lad pathai khubor bad ïa kane ka kam ym pat wanrah satia sha ka jingtip ka kynhun synrop.
“Nga la iohi tang ha ki kot khubor.Ngi ju don jingialang man ka por jong ka MDA. Lada don kino kino ki ishu ba iadei bad ki constituency jong ki, ngi long kiba kloi ban iakren bad iasam jingtip.Man ki paralok ha ka MDA ki ju wan kren ia nga, ia u Myntri Rangbah bad ia u Bah Sniawbhalang Dhar bad ngi ju pynbeit ia ki.Ngam iohi satia ban don kano kano ka jingeh” ula ong.
U la ong ba ki khubor lehse ki pyni ba ki don jingiadei bad ki kam pohiing bad ki jingiashrut hapoh ka UDP.
Haba kylli la kan don jingktah ïa ka NPP, u Bah Prestone ula ong ba ka Sorkar ka skhem ha ka jingdon u nombor.
“Ka jingdon paid jong ngi marwei (NPP) ka long haduh 33.Ngi donkam 30-31 ban thaw ia ka Sorkar, kumta ngi la tam ia u pud” ong u Bah Prestone.
Ula ong ruh ba ka NPP hi kan ym tuklar ïa ki kam pohiing jong kiwei pat ki seng sain pyrthei.
Shuh shuh u Bah Prestone u la ong, “Ngim don eiei ban kynthoh halor kane namar ka dei ka kam ïing jong ki bad ki jingsngewthuh shimet.Hynrei ka Sorkar hi ka long kaba khlain, kaba skhem bad kan pyndep ïa ka samoi treikam ba pura haduh u 2028 bad palat”.