Shillong, Nailur 01: U Myntri Rangbah ka Jylla uba dei ruh u President ka National People’s Party (NPP), u Conrad K Sangma u la ong ba u shu ïohi ha ki lad pathai khubor ba don ki MLA ka UDP ki ba thmu ban leit rung noh sha ka party BJP.
Haba kren bad ki lad pathai khubor hadien ka jingialang ha Tura, u Myntri Rangbah u la ong ruh ba kane ka dei ka kam Ïing jong kawei pat ka party bad kumta um shym da pynleit jingmut than.
Haba kylli lada ka jia kumba ka paw, u Conrad u la ong ba kan ym ktah satia ïa ka Sorkar lada ka don ka jingkylla ha kitei ki ar seng namar ba ka party jong u ka la don lypa ia ka jingbun paidbah lane majority.
Shuh shuh haba kren halor ka jingphriang stet kine ki khubor leit Ïasoh BJP, u Conrad u la bynrap biang da kaba ong, “Haduh mynta kane ka dang sah ha ka jingdum naba la shu ïohi tang ha ki lad pathai khubor.”
Shuh shuh u la ong ba lada kane ka dei ka jingshisha, u Conrad u la ong ba kin sa peit tad haduh ban da poi ka por kumno ban leh
Lah ban kdew hangne ba ha kine ki khyndiat sngi ba la dep ka hamsaïa saiñpyrthei ka la her stet bha ba ki don haduh 9 ngut ki MLA na ka UDP kiba la khreh ban pynïasoh noh sha ka BJP. Hynrei halor kane, na ka liang ki nongïalam ka UDP ki la kyntait ba kadei kaba shisha.
