Shillong, Nailur 1 : ïa ka por ban pyndep ïa ka Special Intensive Revision (SIR) 2026 ha Meghalaya la hap ban pynjlan noh sa 14 sngi hadien ka jingthut ka shongsuk shongsaiñ ha Shillong kaba la ktah ïa ka jingsngap bad bishar ïa ki nongthep vote ha u bnai bala lah, bad ïa ka electoral roll ba khatduh yn sa pynmih noh ha ka 21 tarik Risaw.
U Chief Electoral Officer (CEO) Dr BDR Tiwari ha ka sngi Ba-ar, ula shong bishar ïa ka jingïaid ka jingphah shithi bad ki hearing bad ki Deputy Commissioner, DEO, ERO bad AERO bad kumjuh ruh bad ki seng saiñ pyrthei.
Haba ai ïa ki jingtip ba bniah,u CEO ula ong “Kat kum ba ka long mynta, 6,51,735 tylli ki notice lah dep ban pynkhreh ha kaba 5,71,989 tylli lah dep ban pynpoi sha ki nongthep vote. La bthah ïa ki district ba kin pynkloi ha ka jingpynpoi ïa ki notice ba dang sah bad pynthikna ba ki nongthep vote kin ïoh ïa ka lad kaba biang ban wan sha ki hearing bala buh bad ai ïa ki kot ki sla kiba donkam”.
Na kine, 1,29,298 ki hearing lah dep ban pynlong. Ki Ophisar ki pyntip ba 297 ngut ki nongthep vote la shem ba kim lah ban rung ha ka electoral roll hadien ba bishar lut ïa ki kot ki sla.
Haba batai ïa ka jingheh ka kam ban pynshisha ïa ki nongthep vote, u CEO ula ong “Kat kum ki jingkheiñ ba la bishar, 2,22,786 ngut ki nongthep vote ki hap ha ka No Mapping Category, katba 4,28,858 la ithuh ba don jingbym biang ha ka jaka sah jong ki, kaba long baroh 6,51,644 tylli ki case ba donkam ban pynshisha”.
Kine ki kynthup ïa ka jingbym ïahap ki kyrteng bad ki kyrteng ki Kmie Kpa ha ka thup 2005 bad ki jingbakla ha ka rta hapdeng ki bahaïing hasem ba la shem lyngba ka ECINET.