Shillong, Naiwieng 10: Namar ba kan don ka jingrakhe ïa ka Diwali ha ka 12 tarik u Naiwieng, na ka liang ki bor pynïaid district jong ka East Khasi Hills ki la shah ban die ban thied ïa ki bom pataka tang na ki dukan kiba la ïoh jingbit na ki bor ba dei khmih.
Ha ka hukum la bthah ruh ba ka jingthang ïa ki bom pataka kan long thik naduh ka por 8 baje mynmiet haduh ka por 10 baje mynmiet.
“Ia ki bom pataka la shah ban thang naduh ka por 8 baje mynmiet haduh ka 10 baje mynmiet, ka ban ïaid katkum ka hukum kaba la pynmih da ka Supreme Court of India ha ka Writ Petition (C) No.28 of 2015-Implementationof Judgement dated 23.10.2018.”, la ong ha ka jingpynbna paidbah.
Nalor kane, la maham tyngeh ban thang ïa ki bom pataka ha ki jaka kiba dei ban kynjah jar jar ne Silence Zones, nuksa kaba mut, dei ban jngai 100 mitar na ki hospital, nursing home, primary bad district health care center, jaka pule, ki ïing bishar, jaka mane Blei ne kino kino ki jaka kiba la pynbna ba ki dei ki Silence Zones da ki bor sorkar.
Ki bor pyniaid District ki la kdew ruh ba dei ban die tang ki bom pataka ki bym pynmih tdem bun than. Ka jingshna, jingdie bad ka jingpyndonkam ïa ki bom pataka kiba pynïasohlang baroh, ka dei kaba la khang pyrshah namar ba ki pynmih bun palat ïa ka tdem, jingsawa bad kumjuh ruh ïa ki jaboh.
Ha ka jingpynbna paidbah la bynrap ruh, ba ka jingdie ne jingpyndonkam ïa ki bom pataka kiba sawa jam bha ne kiba palat ïa ka 125 dB (Al) ne 145 dB (C) pk kaba 4 mitar na ka jaka kaba thang ka dei kaba la mana tyngeh.
