Shillong, Naiwieng 10 : Ka Hynñiewtrep National Liberation Council (HNLC) shen kan rai haba ïadei bad ka jingkular ka sorkar na ka bynta ban map noh ïa ki kam beaiñ jong ka seng.
Ki nongïalam ka HNLC ki la buh ïa katei ka mat jingdawa ban mab noh ïa ki kam beaiñ ha ka tri-partite meeting kaba long ha ryngkat ka jingdonlang u ksiang jong ka sorkar u Bah Peter S Skhar bad u AK Mishra, Advisor ka tnad Kampohiing ka Ri ha ka 24tarik Jylliew.
Katkum ka jingong jong ka seng, ka jingmab noh ïa ki kam beaiñ ka long kaba donkam na ka bynta ban pynïaid shakhmat ïa ka jingïakren ïasuk.
Ki tyllong khubor ki ïathuh ruh ba ka sorkar jylla ruh ka pynpaw ïa ka jingkloi ban ai ka jingmab ïa ka seng ha kine ki khyndiat por ban wan.
Dang ha ka 4tarik Nailur, u Symbud Myntri Rangbah ka jylla ba dei peit ïa ka tnad Kampohiing, u Bah Prestone Tynsong u la ong ba ka sorkar ka la dep ban ïa kren bad ka HNLC ba ki kwah ba u Chairman ka seng u Bah Bobby Marwein kumjuh u General Secretary jong ki u Sainkupar Nongtraw ba kin don lang ha ka sien ïa kren ïa suk ha ka kylla kaba ar. U Bah Prestone u la dep ban pynpaw ruh ba ka bor mynta ka shong ha ka rai jong ka HNLC bad ba ka sorkar mynta ka ap sa tang ka rai jong ki ban pynïaid shakhmat ïa ka jingïakren ïasuk.
Ki tyllong khubor ki ïathuh ruh ba ki nongïalam jong ka HNLC kiba sah shipor ha Ri Bhoi District ki la leit phai lut sha Bangladesh ha u bnai ba la dep. Kine ki kynthup naduh u political secretary Aristerwell Thongni, foreign secretary Phrangkupar Diengdoh bad ki PSO ba kynthup ïa u Rymphang Marwein, Storgy Lyngdoh, Aiborlem Marbaniang bad u Raymond Lapang.
Ki tyllong khubor ki ïathuh ruh ba ka HNLC kan sa shim ïa ka rai halor katei ka jingong jong ka sorkar ha ki khyndiat por ban wan. La ong ruh ba ka sien shong ïa kren ïasuk kaba ar kan sa long tang ahdien ba ka HNLC ka la phah ïa ka rai jong ka sha ka sorkar.
