Pulom ka jingïalang ka JAC ha Boirymbong bym ai jingbit ka Shnong

Bhoirymbong, Naiwieng 10: Ka jingthmu jong ka Joint Action Committee, kaba pyrshah ban pynkut ïa ka Cheery Blossom Festival ha ka Sngi U Blei, ka la pulom na ka daw ba ka Shnong Lumdaitkhla, kam shym la ai jingbit ïa ki ba kin pynlong ïa kane ka jingïalang.
Hynrei na ka liang ki dkhot jong ka JAC, ki la ïathuh ba ki ladep ban ai jingthoh lyngba u Secretary ka Shnong ban pynlong jingïalang ha ïew Bhoirymbong bad kumjuh ruh sha ki bor synshar jong ka Ri Bhoi District bad kim shym la ïoh kano kano ka jingthoh bym shah pynlong bad dei tad haduh ka por 11:30 hynne mynstep ba ki la ïoh sngew na ka jingpynbna na ki tynghung jong ka Shnong bym shah ban pynlong jingïalang ha katei ka jaka kaba don marjan bad ka Madan Kurkalang, kaba mut ban pynlong ïa ka Festival.
Wat lada ka Shnong kam shym la shah ban pynlong ïa ka jingïalang, hynrei la ïohi ba ki Pulit bad ki CRP ki la poi ha kane ka ïew naduh mynstep ban pahara ïa kane ka jaka ba mut pynlong jingïalang. Na ka liang ka JAC ruh namar ba ka Shnong ki la rai ban nym pynlong shuh ïa ka jingïalang, kaba ki thmu ban pynshai paidbah balei ba ki pyrshah ban pynkut ïa kane ka Tamasa ha ka Sngi U Blei.
Haba ïakren bad ki nongthoh khubor ki Samla jong ka Shnong Lumdaitkhla, kiba dei ki nongïalam jong ki Sengbhalang bapher bapher na katei ka thaiñ bad ki dkhot ka JAC, ki la pynpaw ka jingsngewkhia ïa ka jingleh ki bor shnong, kiba la khanglad ïa ban pynlong ïa kane ka jingïalang kaba jai jai, kaba shu pynshai ïa ki paidbah balei ba ki pyrshah ban pynlong ne pynkut ïa ka tamasa ha ka sngi U Blei. “Ngi im ha ka ri India kaba synshar paidbah, hato ha kane ka Shnong la synshar da ka synshar donbor mo”, la ong ki Samla,kiba la pyntip ruh ba ki ladep ban ai ia ka shithih ha ïing u Secretary Shnong ha ka por kaba biang.
Ki la ong ruh ba kim pyrshah ban pynlong ïa kata ka Tamasa ban mane ïa u dieng ne burom ïa uta u syntiew jong ki nong Japan, hynrei ki pyrshah ban pynlong ha ka Sngi U Blei, namar kadei ka sngi ba ki paid Khristan ki ñiew kyntang bad ñiew khuid. Nalorkata ki la ong ba ba marjan jong kane ka jaka ba pynlong ïa ka Festival, ki don shibun ki ïingmane ba kan ktah ïa ka jingshakri Blei jong ki khun Khristan.
Haba la kylli pat kaei ka jingsngew jong ki haba ka sorkar lyngba u Symbud Myntri Rangbah, u Bah Prestone Tynsong ka la rai ban pynlong ïa ka sngi kut tamasa naduh ka por 3 baje janmiet shaneng, ki dkhot ka JAC, ki la ong ba ka sngi U Blei ka kut haduh ka por 12 baje mynmiet bad lada ka tamasa ka sdang ha ka por 11 baje ruh ka dang dei hi ka sngi U Blei bad na la liang jong ki, kim lah ban pdiang satia ïa kane.
Halor ka jingong pat u Bah Prestone ba ha ki snem ban wan ka sorkar kan ïaleh ban kiar ban pynlong bad pynkut ïa ka tamasa ha ka sngi U Blei, ki dkhot ka JAC ki la ong ba kane kadei ka jingjop jong ka kito kiba pyrshah ban pynlong tamasa ha ka sngi U Blei bad kyrmen ruh ba ka sorkar kan bat la ka kular kumba ka la pynpaw lyngba da u Symbud Myntri Rangbah.