Sdang phriang ki khubor ba ka elekshon MDC kan ym long ha u 2024 lah ban pynkynriah sha u 2026
Jar jar long kumba ym don elekshon ha u 2024
Shillong, Naiwieng 10 : Ha kine ki khyndiat sngi la sa phriang ka khubor ba ka elekshon MDC ha Khasi Hills Autonomous District Council (KHADC) bad ruh ha Jaintia Hills Autonomous District Council (JHADC) ka lah ban ym long shuh ha u 2024 hynrei lah ban pynkynriah noh ïa ka sha u snem 2026 namar ka sorkar jylla ka dang ïai ap ïa ka jingpynkhreh ban wanrah ka jingpynkylla thymmai ïa ka 6th Schedule hapoh ka ïing dorbar thaw aiñ Parliament jongka ri.
Haba pyrshang ban pyntikna ïa kane na ki katto katne ki MDC (bym kwah ban pynpaw kyrteng) ki la ïathuh ba kim pat ïoh jingtip ïa kane hynrei ki ruh ki pynpaw ba ka lah ban long kumta ne ka lah ban ym long ruh tangba ki la pynpaw ba ki ruh ki la ïohsngew hi ïa kaba kum kata ka khubor.
“Ngi la shu ïohsngew ïa ka jingïathuh ki paralok hynrei ban ong ba ka dei ne kam dei ngim pat tip namar ka dang dei tang ka jingïathuh khana paralok,” ong uwei na ki MDC ba don ha ka liang synshar ha KHADC ha kane ka sngi Palei.
Don pat u MDC uba la pynpaw ba ka jingjar jar jong kiba bun ki MDC na bynta ka elekshon MDC kaba dei ban long ha u snem ban wan ka la pynartatien bad kane ka jingphriang ki khana ka lah ruh ban long kaba dei.
“Ha ka elekshon ba la dep naduh u bnai Jymmang – Jylliew ki kyrtong MDC bad ki MDC barim ki la bunkam ka leit pynlong jingïalang ne ïalap elekshon hynrei mynta ka kynti pat ki jar jar bad ym pat don kiba patiaw ban leit ïalap elekshon ruh. Lada dei ba ka elekshon ka long shisha ha u Lber – Iaiong jong u snem ban wan, lehse ym don MDC shuh ba wan sha District Council hynrei kin bunkam ha ki constituency jong ki,” u la ong.
Tangba lada phai na kaei kaba u CEM ka KHADC u kren dang shen, u la ong ba kam pat don satia kano kano ka dak ba ka elekshon MDC ha KHADC yn pynjlan shwa.
Kumta, ka jingmih kum kitei ki khubor ka pynkulmar mynta wat ïa kito ki kyrtong kiba thmu ban ïakhun ha kane ka elekshon MDC.
Lah ruh ban kdew hangne, ba ka elekshon MDC ha Garo Garo Hills Autonomous District Council kam shym la long ryngkat bad ka KHADC ne JHADC ha u snem 2019 hynrei ka la long hadien arsnem kata ha u snem 2021. Kumta ka elekshon ban wan ha GHADC kan long noh ha u 2026. Lehse dei na kane ka daw ba sa mih ki khubor ba ka elekshon MDC ha Khasi bad Jaintia ruh ym pat long ha u snem ban wan hynrei ka lah ban long lang ryngkat bad ka GHADC.