Shillong, Risaw 04: Palat 10,000 ki kali saw shaka bad 17,000 tylli ki ar shaka kila aplai ban ïoh ïa ka Registration number ha ka jylla tang ha u snem 2023.
ïa katei la pyntip da ka Tnad Transport ha ka jingïalang kaba la lum da u Chairman ka Meghalaya State Planning Board (MSPB) Bah Metbah Lyngdoh mynta ka sngi Thohdieng.
U Commissioner & Secretary ka PWD kynthup ka NHIDCL bad ka Transport, kila ai ïaka jingtip bad ka jingbatai kaba bniah sha ki dkhot jong ka Board bad haka jingïalang la pyntip ba ka East Khasi Hills District ka dei kaba bun tam haka jingrejistar ïa ki kali.
“Nalor kane, la sakhi ruh ha ka jylla la rejistar haduh 10,000 tylli ki kali saw shaka bad palat 17,000 tylli ki ar shaka ha u 2023 bad ka long kaei kaei kaba sngewkhia bha” ong u Bah John F Kharshiing u dkhot jong ka Board.
Ula ong ba ka jingïalang kala ai jingmut ïa ka jingdonkam ban pynduna ba kawei ka longïing ka dei ban don tang 2 tylli ki kali kumba la leh ha kiwei pat ki ri bad ban sdang ruh iaka Odd-Even System ha ki jaka kiba khapngiah bad ban don ïa ki jaka pynieng kali kaba biang haba thied ïa ki kali.
Nalor kane, ka jingïalang kala ai jingmut ruh ïa ka jingdonkam ban don ïa kiba kum ka ISBT ha ki jaka kiba don ha khapsor khnang ba ki kali kin ym leit lut baroh sha Shillong.
Kala banjur ruh ban don noh ïa ki Online Taxi, ki jaka kyntiew bad jaka pynhiar ïa ki nongleit nongwan bad kila ïatai ruh ha kaba ïadei bad ka jingduna ki pulit Traffic hapoh ka nongbah.
Ha kawei pat ka liang, ka Board kala rai ban khmih bniah ïa ka jingpyni bad jingbatai bniah jong ka tnad Urban, PWD, Transport bad Police hashwa ba kan shim ïa ki lad ki lynti ban ai ïaki jingbthah sha ka sorkar jylla ban shimkhia ha ka ban weng ïa ka jingeh na ka jingkhapngiah ha nongbah Shillong.
Ha kane ka jingialang, ka PWD kala pyntip ruh ïa ka jingthmu ban shna ia ki surok Highway ha Umshyrpi kynthup ïa ka Flyovers shaduh sha Barik.
