Shillong, Risaw 04: Ki pulit ki la ïathuh ba hadien ba ki la ïoh ka jingtip kaba thikna ki la leit ban khynra hapoh kawei ka dukan u Ramjan Ali (scrap dealer) kaba don ha Fourth Furlong, Shillong bad ki la lap ïa ki tiar kiba la shah tuh na katei ka dukan. Ha ka jingtohkit ki pulit la kynnoh ba u tei u Ramjan Ali um shym la lah ban ai ka jubab kaba pynhun shaphang kitei ki tiar kiba la shah tuh.
Ha kawei pat ka jingjia ki pulit ki la ïathuh ba u Ajay Agarwal u la phah ka jingujor ba ha ka 2 tarik mynta u bnai ha ka por 12 baje nohphai sngi, ki runar bym lah ban ithuh ki la tuh ïa ka Maruti Eeco jong u kaba don u nombar ML-05Z-0475 na thaiñ Rilbong, Shillong.
Shuh shuh na ka liang ki pulit ki la ïathuh ba ka kong Theisara Pariat ka la phah ka jingujor ba ha ka 1 tarik mynta u bnai, ki runar bym lah ban ithuh ki la tuh haduh 9 tylli ki pipe nar, 2 tylli ki tyrnem, ka water pump, u earthing copper wire, 32 tylli ki nar rod, bad kiwei kiwei ki tiar kiba shongdor kumba T. 59,580/- na Laitkor Mawrie Lumheh (EKH).
Ha kawei pat ka jingjia ki pulit ki la ïathuh ba ki la ïoh bat ïa kumba 5 ngut ki nong Bangladesh kiba wanrung beaiñ sha India bad kitei ki 5 ngut ki dei ba la ithuh kyrteng da ka Pulesori Bormon ba la 70 snem ka rta, ka Adoring Bormon ba la 50 snem ka rta, ka Nomita Rani ba la 23 snem ka rta, Anando Bormon ba la 25 sne ka rta bad 3 ngut ki khynnah shynrang kiba dang shong ha ka bus kaba don u nombar ML-05N-9723 ha Barengapara West Garo Hills (WGH).
