Tang ha ki jingphohsniew sahkut ka jingpyntreikam ïa ka Solid Waste Management Rules, 2016
Shillong, Nailar, 30: Ka jingpyntreikam ïa ka Solid Waste Management Rules, 2016 ha Meghalaya ka la shu sahkut sa tang ha ki jingphohsniew namar ka jingbym don ki aiñ ba ïadei bad ki bor synshar shnong kiba lah ban pynkupbor ïa ki ban pyntreikam ïa ka Rule.
Ïa kane la pyntip da u Comptroller and Auditor General of India (CAG) ha ka kaiphod Audit halor ka Solid Waste Management ha ki jaka sor ha Meghalaya na ka bynta u snem uba kut haduh ka 31 tarik, Lber, 2022 ba la wanrah da u Myntri Rangbah ka Jylla u Conrad K. Sangma ha Iingdorbar Thawaiñ ha ka sngi Thohdieng.
Ka kaiphod ka ong ba ym don napdeng ki Municipal Board ha Meghalaya bad ki ar tylli ki Autonomous District Councils ka JHADC bad GHADC, kiba la thaw ïa ki ain (bye-laws) ban pyntreikam ïa ka SWM Rules, 2016, katba dei tang ka KHADC kaba la pynmih ïa ka Khasi Hills Autonomous District (SWM) Act, 2020 ha u Rymphang 2022, kaba pynlong ïa ka jingpyntreikam ïa ka SWM Rules ban nym treikam namar ka jingbym don ki aiñ kiba pynkupbor katkum ka aiñ.
Katkum ka SWM Rules, 2016, ki bor synshar shnong ki donkam ban thaw ïa ki aiñ da kaba pynrung ïa ki kyndon jong ka SWM Rules, 2016, hapoh shi snme naduh ka sngi ba la pynbna ïa kine ki rul.
Ka Meghalaya State Waste Management Strategy and Policy jong u Jylliew 2019 ka kdew ba ki bor synshar shnong kin thaw ïa ki aiñ da kaba pynrung ruh ïa ki kyndon jong ka State Policy & Strategy Document na ka bynta ka jingpyntreikam ïa ka rul ha la ka jong ka jong ka jong u pud u sam.
Ka kaphod CAG ka lap ruh ba ym don hi ruh wat napdeng ki municipal board ha Meghalaya ki la thaw ïa kino kino ki aiñ na ka bynta ban pyntreikam ïa ka SWM Rules tad haduh ka 31 tarik, Lber, 2022.
Shuh shuh ka kaiphod ka lap ruh ba watla ki ADC ki dei ban thaw ïa ki aiñ hapoh ka SWM Rules, 2016, ka JHADC bad ka GHADC kim pat bud satia ïa kine ki jingbthah tad haduh ka sngi ba la pynlong ïa ka jingshim jingkheiñ ha u Naiwieng, 2022, katba ka KHADC ka ladep pynbna ïa ka KHADC (SWM) Act, 2020 ha ka 10 tarik, Rymphang, 2022.
Ka Shillong Cantonment Board ka la pyntip ha u Kyllalyngkot, 2023 ba ki la phah ïa ka Draft jong ka Bye-law sha ki bor bahalor ha u Nohprah, 2022 bad ki dang ap ïa ka jingmynjur. La shem ruh ba ka Draft Bye Law jong ka Shillong Cantonment Board kam pat ïoh jingmynjur satia wat haduh u Kyllalyngkot, 2023.