Shillong, Nailar, 30: U MLA jong ka Voice of the People Party (VPP) na North Shillong u Bah Adelbert Nongrum ha ka sngi Thohdieng u la pynpaw ïa ka jingsngewkhia halor ka jingshim kabu jong ki briew ban thad pynrkhiang ïa ki jaiñ ha ki jingker nar ha Khyndailad.
Haba wanrah ïa kane ka mat ha ki kynta kylli jingkylli ha ka Dorbar Synrai ha Ingdorbar Thawaiñ ka Jylla ha ka sngi Thohdieng u Bah Nongrum u la ong ba la ïoh jingtip halor ka jingthad pynrkhiang ïa ki jaiñ ha ki jingker nar ha Khyndai Lad ha ka 22 tarik Risaw, 2019.
U la ong ba kane ka jingjia ka dei kaba sngewkhia bha bad ka long ruh ka jingpynlehraiñ namarba ka Khyndai Lad ka dei ka kad khaii bad ka jaka kaba ki nongjngohkai pyrthei ki ju sngewtynnat ban leit jngohkai haba ki wan kai shapoh ka jylla.
Ha ka jubab, u Symbud Myntri Rangbah uba khmih ïa ka tnat Pynroi Sor u Bah Sniawbhalang Dhar u la ong ba kam shym la don kano kano ka jingujor ba la ïoh pdiang halor kane ka kam.
Hapdeng ka jingkulmar thlim ban jubab ïa ka jingkylli jong u MLA ka VPP, hynrei watla katta u Symbud Myntri Rangbah u la kular ba un sa shimkhia noh mardor ban bthah ïa ki ophisar jong ka tnat Pynroi Sor ban ym shah ïano ïano ruh ban thad jaiñ ha ki jingker nar, kiba la ker kum ka jingïada ïa ki paidbah ba ïaid na ka lynti ïaid kjat.
