Shillong, Nailar 30: U Myntri uba khmih ïa ka tnat Revenue & Disaster Management u Bah Kyrmen Shylla ha ka sngi Thohdieng u la ong ba ka jingthmu jong ka sorkar ka long kaba shai ha kaba ïadei bad ka aiñ die jaka ne ka Land transfer Act kaba la bud pyrkhing bha da ka sorkar kaba long ruh na ka bynta ka bha ka miat jong ki nongshong shong bad ki paid riewlum ka jylla.
` Ïa kane u la jubab ïa ka phang ba la wanrah da u MLA ka VPP na North Shillong u Bah Adelbert Nongrum ha Dorbar Synrai.
“Manla ki kam ha kaba ïadei bad ka jingdie ïa ki jaka puta ka dei ban ïaid katkum ka aiñ bad kadei ruh ban wan lyngba ka tnat Revenue bad Disaster Management,” ong u Bah Shylla.
“Ka long kaba shai ba ka sorkar lada ka leh ïa kano kano ka kam ban die jaka, ban pynphai ïa ki jaka ne kiwei ki kam kiba ïadei bad ka jingdie ïa ki jaka ka ïaid beit katkum ki kyndon jong ka aiñ bad ki kyndon ba la buh hapoh ka Meghalaya Transfer of Land Regulation Act 1971 bad ka Meghalaya Transfer of Land Regulation Rules, 1974,” u la bynrap.
Shuh shuh na ka liang jong u Myntri u la ong ba hapoh ka Section 3 jong kane ka aiñ bad kiba la pynthymmai na ka por sha ka por dei ban pule khnang ban lait na ki jingsngewthuh bakla.
U la ong ba katkum ka kyndon ne ka Section 3 ka la kdew shai ba ki jaka ne khyndew hapoh Meghalaya ym lah ban die ne ai sha kino kino ki bar jylla lait noh lada ïoh ka jingbit na ki bor badei peit.
“Ïa kane ka kyndon la nang pynkhlaiñ shuh shuh da ka jingpynkylla thymmai ha u snem 1973 da kaba pyndap shuh shuh ïa ki kyndon da ka sorkar jylla, na ka por sha ka por, da ki jingpynbna ba bun rukom bad kiwei kiwei ki kyndon,” u la ong.
“Ïa kane ka kyndon la pynbha shuh da ka ïing dorbar ha u snem 1991 ha kaba la pyndap biang ïa ki kyndon kiba pyrkhing ha kaba ïadei bad ki kam ïadie ïathied jaka kiba hab hapoh ka clause (e) ne clause (f) jong ka sub-section (1) jong ka Section 4,” u la ong.
Shuh shuh u Bah Shylla u la ong ba ka jingpyntreikam ïa ka Meghalaya Transfer of Land (Regulation) Act, 1971 ka long ban buh ïa ki kyndon haba ïadei bad ki kam die bad thied jaka ha Meghalaya kaba long ruh kum ka lad ban ïada ïa ka bha ka miat jong ki riewlum ha ka jylla.
U la ong ba ki don ki kyndon kiba pyrkhing bha haba ïadei bad ki kam ïadie ïathied jaka ha kaba ki nongthied kin hap ban aiti ïa ki aplikeshon sha deputy commissioner. Kine ki aplikeshon ki kynthup ïa ki jingpyntip ba bniah naduh ki kyrteng ki address jong ki nongthied bad ki nongdie, ka jingbatai ïa ka jaka, ka jingmynjur ban die ïa ka jaka bad kiwei kiwei ki jingpynithuh kiba long lyngba ki kot ki sla.
Halor kine baroh na ka liang ki deputy commissioner kin khmih bniah lyngba ki kyndon kiba la batai hapoh ka Meghalaya Land Transfer (Regulation) Act, 1972.
Ïa kane ka jingtyrwa la phah ban ïoh ka jingmynjur sha ka tnat Revenue & Disaster Management, bad ka la don ruh ka jingkhmih kiba long ruh hapoh ki kyndon jong ka Meghalaya Land Transfer (Regulation) Act, 1972, kaba long ruh katkum ki kyndon bad ki bor ba dei khmih.
