Syrtok ki nong Mawlai bym shah kamai shuh ïa ki bos saw lyngba ka Motphran

0

Shillong, K’lyngkot 15: Jan hadien shibnai ba ka sorkar lyngba ka ophis u deputy Commissioner (DC) u la pynmih ïa ka hukum ban khang sbak ïa ka rung ka mih ki bos saw bad kiwei dei ki jaid bos ba kamai lyngba ka Motphran, na ka liang u Mawphor u la ïoh ban ïakren bad ki katto katne ki nongleit nongwan khamtam kiba sah sha ki thaiñ Mawlai kiba ju pyndonkam bha da kine ki bos ha ka leit ka wan jong ki.
Ha ka jingïakren bad ki paidbah ki pynpaw ba kane ka jingleh ka sorkar ka la pynsyllang shibun eh ïa ki namar ka jingbym shah kamai ïa ka bos ka mut ka jinghap pynlut ar shah ka bai kali ban shim da ki taksi kamai.
“Lada ngi leit da ka bos na Motphran haduh Mawlai Petrol Pump kin shim bai kali 10 tyngka katba lada ngi leit da ki taksi ngi hap ban siew bai kali haduh 30 bad phi sngewthuh ka ktah ne em ïa ngi u duk u suk,” ong kawei ka long kmie.
Shuh shuh kawei pat ka long kmie ka ong ba ym tang ba lada shah ïa ka bos ban kamai ka pynduna ia ka jinglut hynrei ki nongleit ruh ki sngew shngaiñ namar ha kano kano ka por ka bos ka don beit kaba leit buh ia ki nongleit pong wan.
“Ki ai daw ba lada shah kamai ïa ki bos jur kata ka dheng kali hynrei peit hi ma phi dheng kali ne em mynta bym shah ïaid bos shuh. Nga te nga nud ban ong phi ba kane ka dei tang ka jingai daw ka sorkar namar ka kwah ban khñiot ïa ngi ki duk ki rangli kiba im da kaba bylla mynsngi bam da miet. La kumno kumno ngi kwah ba ka sorkar kan ai lad biang ïa kine ki bos ba kin kamai khnag ba kan ïarap ïa ngi,” ong kawei ka kong kaba die wai dong ha Motphran.
Haba ïakren bad katto katne ki nongñiah bus ki ruh da kawei ka sur ki pynpaw ba ym tang ba ka ktah ïa ki paidbah ba leit ba wan kiba ju pyndonkam da ka bos hynrei wat ïa ki kiba im ja na kane ka kam ñiah kali.
“Ngi ba la kamai da kane ka kam la 8-10 snem ka la ktah ym tang ïa ka kamai hynrei ïa ka ïap ka im syndon hi keiñ namar mano shuh ban dang leit da ka bos haba ym shah shuh ban kamai sha Motphran,” ki la pynpaw.
Shuh ki ong ba ka long kaba sngew bynñiaw ba u MLA bad MDC kim ïohi kat ïa kane ka jingeh kaba ki nong Mawlai ki mad.
“Namar ka sorkar ka la khñiot eh ïa ngi, ki nongmih khmat ruh kim ïohi ïa ka jingeh ba ngi mad ngi kham shaniah sa tang ki seng bhalang ba kin ïarap lem ïa ngi ïa kane ka bynta,” ong ki nongleit nongwan bad ki draibar ruh.
“Ban kamai bos ma ngi sha Mawlai ai daw ba ngi wanrah ïa ka dheng kali ban shna dara ki dkhar ban lehniam puja wat ha ha surok ruh ka sorkar ka ailda beit ïa ki bad kane hi ka pyni ba kane ka sorkar ka dei kaba long pyrshah ïa ka bit ka biang uba duk ba kyrduh”, ong uwei sa uwei pat u nongñiah bus.

Leave A Reply

Your email address will not be published.