Shillong, K’lyngkot, 15: Ha ka jingkhynra kaba jop pyrshah ïa ki snar khaiï drok, ka kynhun jong ki Pulit ka Jylla ki la ïoh kem ïa arngut ki snar khaiï drok bad ïoh kurup haduh 10 synduk u drok uba shongdor T.70 lak ha ka jingkhynra hynnin ka miet sngi Saitjaiñ.
Nalor kaba ïoh kurup ïa u drok, ka kynhun ki Pulit ka East Khasi Hills District kiba la ïoh jingtip kaba bniah na ki tnat syntiat, ha kane ka jingkhynra ki la ïoh kurup ruh ïa kawei ka kali Swift bad ar tylli ki mobile phone na ka met jong ki arngut ki snar khaiï drok.
U Myntri Rangbah ka Jylla u Conrad Sangma haba ai jingïaroh ïa ka kynhun Pulit ha ka rynsan Twitter u la ong, “ka jingjylli jong u drok ka la buh jingma ïa ka jylla bad ka thong jong ngi ka long ban pyllait ïa ka jylla Meghalaya na u drok.”
Dang shen ka kynhun Myntri jong ka Sorkar Jylla ka la mynjur ïa ka Drug Reduction, Elimination and Action Mission (DREAM) ban pyllait ïa ka jylla Meghalaya na u drok.
